Breaking

تلقيح ‏فيروس ‏كورونا ‏/الدكتور زكريا ‏بوقيرة ‏: ‏" ‏كان ‏جيت ‏أنا ‏ وزير ‏الصحة ‏أشترى هذا التلقيح ‏ لهذا ‏السبب. ‏. ‏

بعد اعلان تونس، رسميا عن نيتها شراء تلقيح فيروس، كورونا هذا ما دونه الدكتور زكريا بوقيرة في تدوينة نشرها على صفحته الرسمية بموقع التواصل الاجتماعي فايسبوك منذ قليل بخصوص التلقيح الانسب : 


مادام وصلنا لمرحلة اقتناء التلقيح نحب نعطيكم رايي في التلاقيح الي موجودة. نعرف بارشا عباد خائفة. بارشا كلام تقال. برشا مغالطات صارو خلاو الرأي العام خايف. وهذه حاجة طبيعية امام الكم الهائل متع الآراء الي سمعناهم.


باهي خلينا نبداو متفاهمين. في الحالات الكل كان الخيار بين التلقيح (أي كان) والا الفيروس على الف مرة بش نختار التلقيح.


زادا نظريات المؤامرة متع ال5g والpuce والروبوات هذوما خيال علمي ما عندهم حتى أساس من الصحة. ماصاب كان جاء العلم متطور للدرجة هذي رانا توة نداويو العباد من داخل وراهو السرطان قضينا عليه. متأكد بش نوصلولها المرحلة هذي أما مازلنا 30 سنة على الاقل قبل ما يتطور العلم لهذه للدرجة.
أما التلاقيح الي موجودة موش الكل كيف كيف.
فما المباني وفما الي ما نعرفوش.
فما خمسة تلاقيح موجودة توة على السوق.


من جيهة عنا تلاقيح Pfizer و تلقيح Moderna:
تلاقيح مصنوعين بتكنولوجيا الARN. 
شنوة الARN؟ الARN هو كيما الADN تقيد فوقو الكائنات البيولوجية المعلومة الجينية متاعنا. المعلومة هذي هي الي يتم ترجمتها مبعد بش تولي البروتينات. فيروس الكورونا كيف كيف يستعمل الARN متاعو بش يصنع بروتيناتو ومكوناتو. وحدة من البروتينات هذي هي الProteine S هي الي تعونو بش يدخل للخلية متع الإنسان ومن ثما يتكاثر. 


جينا نحنا في التلاقيح هذوما حطينا الجزء متع الARN الي يحكي على الProteine S وزرقناه للانسان. يدخل للخلية يترجمو البدن الى Protéine S. البروتينة هذه جسم الانسان عمرو ماشافها قبل ويصنع عليها مضادات حيوية بش كي يشوفها المرة الجاية يفتقها من بعضها. بعد نهارين ثلاثة يتهلك الARN أما تقعد الذاكرة متع الجسم للProteine S كي يدخل الفيروس البدن يعقل القطعة هذي ويقتل الفيروس. حاجة في مدة صلوحية الARN يقعد في الجزء البراني متع الخلية من غير ما يدخل للnoyau وين موجود الADN متاعنا. معناها ما تخافش ماهو بش يصير حتى تحول للجينات متاعنا.


مشكلة التلاقيح هذوما الزوز هي التخزين. الARN ديليكاتو بارشا واي ضو أي سخانا أي ضربة ينجم يتهلك. هذا لواش تلقيح Pfizer لازمو -80 و Moderna لازمو -20. حتى التريق متاعو special شوية ولازم تكوين الأطباء والممرضين الي بش يزرقوه ما لازمش يتخض بش ما يتهلكش.
إذا التلاقيح هذوما فعالة (90%) موش مخطرين أما logistique صعيبة.




التلقيح الصيني متع Sinopharm:
هو التلقيح الكلاسيكي. الي تعمل فيه الإنسانية عندها 100 عام. يأخذو الفيروس الحقاني يتعبوه يهلكوه لين يفقد قدرتو على الانتشار ويزرقوه في جسم الانسان.
فما زوز حاجات مغرية في التلقيح هذا.
الاولى ما حاجتكش بلوجيستك كبيرة كيما التلاقيح الزوز الي حكينا عليهم خاطر موش ARN ضعيف فيسع يتهلك.
ومن جيهة أخرى المناعة الي تتصنع موش كان على الProteine S. معناها البدن يولي يعقل كل قطايع الفيروس موش قطعة وحدة. 
وهذا كان نخممو بصفة استباقية حاجة مهمة للغاية.
اولا المناعة تدوم اكثر خاطر مناعة على بارشا قطايع.
وثانيا والاهم أنو كان غدوة يضهر الCovid21 الي هو فيروس مثلا حول الProteine S متاعو. التلقيح هذا هو أكثر واحد عندو حظ أنو يقعد فعال على السلالة هذي. خاطر مناعتو متعددة.
إذا التلقيح هذا فعال(70%) أقل من لخرين على المدى القصير أما على المدى الطويل ينجم يكون خير موش مخطر وما حاجتوش بتجهيزات كبيرة.



قعدو زوز في السباق الي وهوما Sputnik الروسي وAstrazeneca الانجليزي:
عندهم حاجة مغرية ومغرية بارشا للسياسيين. هما أرخص وحود موجودين. أما كيما تتصورو كي حاجة تبدأ رخيصة فما لكن.
اللكن هذه هي انهم التلاقيح الزوز هذوما مبنيين على تقنية جديدة أول مرة بش نستعملوها بالطريقة هذه. أستعملت مثلا لمعالجة داء الكلب عند الثعالب البريين في اوروبا واستعملناها زادا في بروتوكولات صحية لمعالجة السرطان عند الانسان.
التقنية تتمثل في انهم ياخذو فيروس آخر في العادة ما يعمل شيء للانسان غير سعات شوية diarrhée والا rhume ويبدلولو جيناتو بش يزيدوه الجين متع الProteine S. نظريا الشخص بش يمرض بالفيروس هذا ما يعملو شيء وبعد يولي الشخص عندو مناعة على مكونات الفيروس هذا منها الProteine S متع الكوفيد الي زدناهالو.


هذا نظريا. بش نبداو واضحين الى الان ما سمعتش بحتى مشكلة صارت في الدراسات السريرية الي صارت. ولكن نظريا ما ننجمش نجزم أنو الزوز تلاقيح هذوما ما يمثلوش خطر كيما جزمت في الي قبلهم. فرضية تحول التلاقيح هذوما الي هوما فيروسات حيين موجودة. ولهذا أنا كان جات عملية إختيار التلقيح نتجنبهم.
أما نعاود نقولها كان يعطيوني الخيار الف مرة بين التلقيح والفيروس الف مرة نختار التلقيح.

سامحوني كان طولت بارشا في المنشور. أما حبيت نبصطلكم المسألة الي نعرف معقدة وموخيفة لبارشا عباد.
في خلاصة كان جيت أنا وزير صحة هذا الترتيب متع الاختيار متاعي:



1-التلقيح الصينيSinopharm خاطر حتى كان أقل فاعلية على المدى القصير على المدى البعيدة ينجم يكون خير وزادا خاطر ما حاجتوش بلوجيستيك معقدة.
2- تلقيح Moderna خاطر أكثر واحد فعال و-20ننجمو نتصرفو بش نعملوها
3- تلقيح Pfizer زادا فعال للغاية أما لوجيستيك صعيبة.
هذوما الثلاثة متأكد أنو ما فيهم حتى خطر
توة كان مكره بش نخطار التلاقيح الي قعدو
4-تلقيح Astrazeneca الانجليزي على الاقل فما دراسات منشورة
5- واخر واحد التلقيح الروسي Sputnik على خاطر كيما الي قبلو ما نعرفوش خطورتو ولتوة ما ريتش ديراسات

Post a Comment

أحدث أقدم