Breaking

الدكتور ‏زكريا ‏بوقيرة ‏: ‏"أمان منعو تونس" ‏

هذا ما دونه الدكتور زكريا بوقيرة على صفحته الرسمية بموقع التواصل الاجتماعي، تعليقا على  القياسية في عدد الوفيات و الاصابات بفيروس كورونا التي سجلتها تونس الفترة الاخيرة، حيث تجاوز عدد الوفيات  10 الاف حالة الي حد الان،. 

وفيما يلي نص التدوينة:

العشرة آلاف الي ماتو موش شوية. 
شالقين بقداش من صيحة متع قهر وحزن خرجت من اعماق طفلة خسرت بوها؟
عندكم فكرة على حرارة الدمعة متع طفل يبوس امو وهي باردة؟
خممتوشي في ظلام عالم متع بو تسرق منو ولدو؟
برشا وجيعة غمت البلاد

صحيح نضحكو صحيح نفدلكو صحيح نتناساو اما هذا خاطر مازلنا ما تمسيناش تمنيت ما نوصلوش لهوني اما هذا هو الوقت الي بش يعم فيه الحزن والالم البلاد الكل
هذا هو الوقت الي فيه اغلب العائلات بش تتمس في شخص عزيز عليها. 
العشرة الألف الي ماتو بارشا. 
اما لسوء الحظ هوما اول عشرة آلاف     

ماناش بش نموتو الكل أكيد اما بش يموتو منا عشرات آلاف توانسة اخرين كان نخليو السلطة على راحتها. 
عشرات آلاف عايلة بش يتصلط عليها الحزن. 
حزن الي عمرها ما كارها حستو. 
مستعدين نظحيو باحبابنا؟
 موش برواحنا، لا بالناس الي نحبوهم؟
خلي نسألوه السؤال لرواحنا
قداش فلوس تسوا حياة أمك حياة بوك حياة ولدك حياة بنتك؟

السؤال يضهر بديهي والاجابة متاعو ساهلة
مال العالم الكل ما يسواش حياتهم 
بالرغم من هذا العباد الي امناهم حياتنا كي تسئللهم السؤال هذا شافو ان حياة والدينا  ما عندهاش قيمة
وتحبوني نسكتلهم والا نرحمهم والا نخاف منهم ؟
الجماعة يحبو يقتلولي أمي   
لازمكم تشوفوها من الناحية الشخصية
هي قضية شخصية

من جيهتي تمشي الا الجحيم الدولة واقتصادها والي تحبو عليه قدام حياة امي
الكورونا في الحقيقة هي درس واختبار من الكون 
شنوة اهم الحياة أو المال؟
كان أخطرنا المال فسنخصر  المال والحياة
اما كان أخطرنا الحياة فسنربح الحياة وسنفاجأ بالمال. 
اي نعم عكس ما يحكيوه البهايم الي في الحكم الي عمرهم ما كانو قادرين على رؤية على ذكاء على بعد نظر الحجر الصحي الشامل يريحنا فلوس موش يخصرنا.
كيفاش؟

اول حاجة لازم تفهموها انو ما لم نتبع ستراتيجية الصفر كوفيد الجائحة بش تتواصل وكل عام بش يزيد يتحول الفيروس ويزيد يقوى. 
الحكاية تنجم تقعد أعوام وما تتفضش. 

المناعة الجماعية مع فيروس يتحول هي وهم قاتل. كالسراب في الصحرة الذي يجر العطشان الى مزيد من الهلاك
من غير ما نحكيو على الأرواح، تصورو حجم الخسائر الاقتصادية  الي تنجر على أعوام في شبه الإجراءات متع التعايش متاعهم
تونس ما تنجمش تتحملهم
شنوة يصير وقتها؟

بخلاف الوباء الي يفتك في الأرواح كل يوم بش ينزاد عليه موش الجوع لا المجاعة
بش يبدا فما أمن وامان وقتها؟
في تاريخ الانسان الأوبئة حطمت حضارات خلي تونس تصورو شنوة ينجم يصير فيها
سيناريو مخيف يستنا فينا كان ما نتخدوش الطريق الصحيح في الأشهر القادمة
خاطر فما طريق صحيح

طريق يخرجنا من الأزمة بأخف الأظرار في شهرين
طريق يرجعلنا حياتنا 
نرجعو فيه احرار
نرجعو نبوسو نعنقو نخرجو نخدمو 
طريق نرجعو فيه نعيشو
هي ستراتيجية كاملة ومتكاملة
تتركز أساسا على حجر صحي شامل قوي لين نرجعو للصفر حالة

مع الحجر الصحي الشامل إجراءات اقتصادية واجتماعية استثنائية نتأكدو بيها انو حتى تونسي ما يستحق يخرج للشارع بش ياكل والا يوكل صغارو
حتى تونسي ما لازمو يجوع 
هذا لازم يكون الهدف متع السلطة كان جات وطنية
بالطبيعة مع سلسلة من الإجراءات الصحية المكملة كيما غلق الحدود في مرحلة أولى، تعميم التحاليل، إسراع حملة التلقيح، عزل المرضى وانقاذ المنظومة الصحية من الانهيار
بعد شهرين كان يتبعو الستراتيجية بحذافيرها تخلو تونس كليا من الفيروس


بعد ندخلو في مرحلة حماية الحدود
بالطبيعة موش بالPCR الي على عشرة أشخاص حاملين للفيروس ثلاثة منهم تجي سلبية
هوني عنا اجراء تستعمل فيه الانسانية عندها اكثر من الف سناء من وقت ما قننها ابن سينة الي هي الارباعينية (في الأصل أربعين يوم) 

الي سميناها عام السناء الحجر الصحي الاجباري
مع الفيروس الاول المدة اللازمة كانت 14 يوم اما بعد التحول لازمنا على الأقل نزيدو جمعة معناها 21 يوم
هذا الي نحكيلكم فيه موش بدعة استعملوه دول أغنى منا وأفقر منا

ليوم الحياة رجعت فيهم طبيعية وربحو الفيروس
نحنا زادا نجمو نتخلصوا  من الكبوس
نحنا زادا نستحقو نعيشو
الحل موش بش يجي من السياسيين
هاكم ريتو أولوياتهم
هاكم ريتو وين بش يهزونا
علاش ديما نتوجهلكم ليكم انتوما؟
خاطر ما عندي أمل كان فيكم
الحاجة الوحيدة أقوى من سلطة طاغية متجبرة وقاتلة هي شعب فايق ومتحد
املي الوحيد هو انتوما
أمان منعو تونس
#حجر_صحي_شامل

Post a Comment

أحدث أقدم