ياسين ‏العياري :توفى الهوجة، نرجع لباريس و إلا لبرلين، نخدم مهندس فريلانس نهاري بألف أورو. ‏

هذا ما كتبه النائب عن حزب أمل و عمل ياسين العياري على صفحته الرسمية بموقع التواصل الاجتماعي فايسبوك:


حبيبي الي بش يتقطعلو عرق يسب فيا،

تعال نفسرلك،

كل الدساترة ولاو تجمعيين قبل 7 نوفمبر ماضي ساعة 
كل التوانسة ولاو ثوريين نهار 15 جانفي
الكلها ربات اللحية 24 اكتوبر 2011
الكلها ولات بجابج 2014
الكلها بش تولي قساوسة اليوم!

لا شيء جديد، هالفورة و المغالاة و هالهستيريا، عشت منها حلقات و ملقح ضدها، طحانا زينيكا.

أنت تسبني و تعلم إنه عندي الحق و لا تقدر أن ترد حرفا على كلامي، لكنها طقوس قلبان الفيستة الجديدة

و الله أشفق عليك،  تحس إنه يلزمك تسكر في راسك و تبالغ و تظهر المساندة العمياء و الولاء علك تقنع نفسك أولا :)

هل حسيت روحك خير تو؟ كي جيت سيبت قلة حياك على حيطي؟ كلامي يوجعلك راسك؟ يدخل فيك غولة؟ إجمد! مزال بش تدخل فيك غيلان! 

حبيبي،

كنت في الخراء، ستبقى في الخراء، لأن أسباب الخراء أعمق بكثير من أن يدركها أو أن يعالجها قيسك.

الفرق؟ تو مجرد الفدلكة أو الإحتجاج، ستسحلك جحافل لجان اليقظة، ثم تتعدالك تطاول بعد أن تاكل ما تيسر من الكف بتعليمات شفوية.. 
قعدتلك المناشدة الذليلة، ريقلنا سيدي الرئيس :) ما تخافش، ستتقنها.

الإرادة الشعبية؟ يتم التعبير عنها بإنتخابات، لا بشكون يعيط أكثر و موش  بالبنادق.

البرلمان خراء؟ موافق، هذا لأنك خراء و انتخبت خراء فوجدت خراء
محسوب تو قيسونك بش يجيب شعب آخر من سنغفورة؟

الديمقراطية مريضة؟ المريض يتداوى لا يقتل.
المال الفاسد؟ انت الفاسد باع نفسه.

تو نستناو 30 يوم و نشوفو؟ اي و كي ما يصير شيء؟ يا حسرة كي كنت تعارض و تحتج :) الي تعارضهم مشاو، هل ستعارض البنادق؟
زعمة أ لخضر 😁

ثم ماذا بعد 30 يوم؟ مزال واحد ينجم يقول كلمة و هو يعلم أنه في أي لحظة تجيه دبابة؟

ستعود السماء زرقاء و العصافير تزقزق! تي البارح وزارة الصحة هبطت 178 ميت و بعد فسختها، 59 برك يزي، عملتلنا سوم.

تعتقد إني حزين على البرلمان و ندافع عليه؟ أحمق!

ما صوتت لحتى حكومة من حكومات الخراء الي عينها قيسونك و قلتها منذ الأسبوع الاول، هاذم ناس حولوا الخلافات إلى عداوات و ما ينجموش يخدمو مع بعضهم.
لكن على أن يكون ذاك في إطار الدستور، لا بالغورة و المدرعات!

ريتنيش نهار في البرلمان هرجت؟ طيحت قدر حد؟ سبيت حد؟
في 3 سنين، 4 مرات ندخل السبيطار، من كظم الغيض باش انجم نخدم في وسط من إنتخبت أنت.

خلي نقلك حبيبي،

توفى الهوجة، نرجع لباريس و إلا لبرلين، نخدم مهندس فريلانس نهاري بألف أورو،  ال cissp معلقة في الحيط.

ضميري مرتاح، خدمت كما و كيفا، تشريعا و رقابة أكثر من ال216 مع بعضهم، حتى هوما ما ينكروهش، حتى أسقط خلق الله و أكثرهم حقارة لا يقدر أن ينكر هذا

هل رمى غيري الحصانة في وجوه الجميع و وقف قدام قاضي عسكري وقله أحكم؟ لا! لا خفت و لا تخبيت و لا هربت :) 

جيت للبرلمان بعد الحبس و المنفى و الثورة، لا بشريان أصوات و لا بتوزيع فلوس و لا بحديث بش نحط فلان في الحبس و لا بش نبردلكم على قلوبكم، جيت بشكارة أحلام و قدرة على العمل ما تنجموش تتخيلوها

الي تعرضو مشكلة في lost and found شكون يتاغي من نواب و حكومة و أحزاب؟ من تونس كاملة؟ 
الي تتسد بيه الدنيا و يوحل، لشكون كنتو تبعثوه؟
تي خليكم صادقين مع أنفسكم، كنتو تبعثوه كان لياسين العياري.

آلاف منكم جات! لا تكتموا الشهادة! سألتش واحد فيكم شكون إنتخب؟ طلبتش من واحد فيكم حاجة؟

لا أعتقد أن  العقلية هذيكا، حديث خضراء رقمية إقتصاد مفتوح و small buisness act و المؤسسات له مكان في عربدة الضوضاء.

هاو راجع البرلمان يخدم في أكتوبر، امسحو بيه بنادقكم! 
كي راجع البرلمان، لواه ماشي؟

ماشي خاطر ما نخدمش تحت تهديد بندقية!
بالك دخلت للبرلمان خاطر مجرم هارب يلوج على حصانة؟
بالك دخلت باش ندبر معارف و أكتاف و الا نعمل فلوس؟

نعرف جيدا، أن موظفين و موظفين سامين تقرأ هذا الكلام! لا تكتموا الشهادة! طلبتش مرة حاجة لروحي؟ لعايلتي؟ أقل إمتياز! :) ميسالش الناس ما تعرفش!

تي كي وقفني بوليس فايت السرعة و قلي واصل، ما تحركت إلا ما كتبلي خطية.

دخلت للبرلمان خاطر عندي حلمة متع تونس بلاش فساد، خضراء ايكولوجية، محترمة في العالم، إدارتها رقمية و إقتصادها مفتوح وين ينجم يكون أي تونسي يجتهد لاباس عليه.

و ما ثماش أحلام تحت الشعبويات! ما ثماش أحلام تحت خوف البنادق

فامسحوا بيه، بنادقكم، البرلمان! 

تسخايبو صعيب ريق مخلوف و عبير و قيس؟ العزف على العواطف و مغازلة أسوأ ما في غرائز البشر : الكره، الحقد، التشفي! هل تعتقدون ما كنتش إنجم نعملو؟ كان خيارا أن لا أفعل.

إخترت الصبر، العركات الصحاح! ريت قيسونكم رئيس جمهورية منقلب و بعسكره و دباباته و شبيحته، عيط لسمير ماجول، قله إذهب فأنت آمن.

كنت نتضارب مع المبروك و شقرون و بن عياد و بلخيرية :)

وروسكم، لو أعاد قيسونكم كل شيء، فما تكسر عميق و لا يمكن إصلاحه

نزلتم من المواطن إلى ال plèbe
فهنيئا لكم لأنكم تريدون!

لن يمس السيستام، سيقوى، سيقدم قضاة و بوليسية و رجال أعمال و مديرين و رؤساء تحرير ولاءهم كيما نهار 15 جانفي و 24 اكتوبر و 2014.. يعيد التموقع، يجيب صناع جدد، العروفات قاعدة، رأس المال الوطني المحمي دوليا سيحكم و ستتم إصلاحات موجعة.. موجعة لكم بالطبيعة.

الفرق، كي تطير السكرة، لن تجد كيف تحتج اليوم و لا تعارض و لا تحاول حتى تبدل! في أسوأ الحالات ستبقى اجراءات إستثنائية، في أحسنها ستعود مؤسسات شكلية قدام الدول المانحة، تحرسها دبابة و بندقية و خاصة لا تطاول على رموز الدولة و لا على رأس المال الوطني.

كم أشفق عليكم، عور عينين الشلايك الي انتخبتوهم، لكن عماكم.

هنيئا لكم لأنكم تريدون!

 الصورة من الكتاب الأخضر، ذلك مستقبلكم: ماض سحيق سخيف مع قائد ثورة التصحيح الرجعي المتزمت الذي لا يؤمن بالحقوق و الحريات و لا بمدنية الدولة و لا بالفصل بين السلط و لا بإستقلال القضاء.. و ثمة اموال منهوبة تحدثت عنها تقارير،  13 مليار و نص يظهر لي 🤣🤣🤣🤣

تو يبرد على قلوبكم بجدار من دخان، و سيفعل ما يريد بلا قيد و لا شرط بإسم المشروعية، و سترضون من باب الي حصلت تكمل ليلتها.

كل من عايش و قرأ عن 1986 - 1990 قال لكم إنقلاب و عارضه! حمة الهمامي خوانجي؟ انور القوصري في البرلمان و عنده شهرية خايف عليها؟ فقط الجاهل و الباحث عن تموقع ركب و قيد روحه قايد الثورة القلسونية الجديدة :)

سالم الأبيض ماكانش وزير عند النهضة؟ محمد عبو؟ مبروك كرشيد؟ 
فقط "تابوا" كي خرجو من السلطة و بدلتهم بصناع جدد.

عجبوني الي يطالبوا بضمانات! هاو ما عطاكمش، فما أنتم فاعلون؟
و كان عطاكم و ما إحترمهاش؟ ما أنتم فاعلون؟
و كان إحترمها شكليا و عيشكم على شبح البنادق؟ ما أنتم فاعلون؟

حتى بورقيبة كي حط رئاسة مدى الحياة، حتى بن علي كي بدل الدستور و حط روحه يترشح قد ما يحب، خرج طحانتهم متع القانون الدستوري و فسرو ذلك بالإرادة الشعبية و أن الدساتير ليست قرآنا و أن الشعب يحب و راضي و يحتفل و القائد الزعيم الملهم لبى النداء و تهاطلت المناشدات و التزغريطات.

ثم كلاكم الكف و الفساد!

الدساتير تحترم! التعدي عليها إسمه إنقلاب! الإرادة الشعبية تعبر عن نفسها في غياب البنادق فقط و بالصندوق. نقطة و أرجع للسطر.

كثير من الثرثرة، لا أكتب لتقرؤوا، الهايج عاطفيا لا يقرأ، تلقى له إشاعة يبرد بيها قلبه يزيه.

نكتب باش غدوة نوريه لولدي، نقله ماكان أبوك طحانا و لا أعمى.

تو الي صار صار، إن شاء الله ينظف؟

ينظف ماذا؟ تي نادية ملاحقة قضائيا! 
ينظف بماذا؟ بقضاء سيدنا الي قلب الولاء!
ينظف ماذا؟ رأس المال الوطني؟ ماو قلنا لا
التبوريب النقابي؟ الطبوبي المنقلب كيفو صاحبو
ينظف ماذا؟ القضاء؟ماو قلنا دخلوا بيت الطاعة سايي
ينظف ماذا؟ الداخلية؟ حاشتو بيهم و لن يفعل! في سيدي حسين نحاو للطفل سرواله، صور مع طفل آخر و قال حالات معزولة
ينظف ماذا؟ النفوذ الخارجي؟ دويو! شادينو من خصيتيه تو! يتحرك أقل حركة يقولو عليه إنقلاب، فتو يسمع و ينفذ و يفشلم علينا

بش يحشي خصومه السياسيين في الحبس كان خلاته أمريكا، يستحقو المحاكمة، لكن لن ينالو محاكمة عادلة عند قضاء سيدنا الي يحب ينسي سيدنا إنه كان قضاء سيدنا لاخر
تو تشيخو في روسكم، تبردو قلوبكم لكن لا أحد منكم سيحظى بمحاكمة عادلة و تحل فمك: تطاول!

وينهم جماعة عبير؟ ويني الوطنية و التضحية و الفازات؟ هاي طلعت جرد بيدق، مهرجة مكلفة بمهمة، كملتها و بش تتعين في الخارج، يمكن في وحدة من المنظمات الي كانت تقول عليها متع جوسسة! و الوطن؟ و التنوير؟ و النضال؟ لا ماعون صنعة و انت كي المدك اتبع! ستقبض الثمن و تخليك طحان و فرحان.

جماعة سامية، السلام، معناها مخالفة قرار مكتب مجلس دكتاتورية و فساد و تغول أما حين يأكل الحمار الدستور، قرارات صائبة؟ 

جماعة مخلوف، هانو لا ملح لا بترول، زعيمكم كان جرد مهرج أبله طماع،غرته الفلوس، خدم شلاكة شلك وراه بلاد كاملة! نتوضاو امالة باش نحكيو على جماعتك؟ عندك الحق، يلزم الوضوء بعد البصة و هذا ما كنت!

جماعة النهضة؟ شامت؟ أكيد! بالي نحب نتعقلن، لكن نقعد بشر!

نهارة الي خرجت في التلفزة قلت الغنوشي سبب الخراب، لطفي زيتون  يبعث مع شكون في وساطات للغنوشي! اليوم قال للمذيعة شبيك تلصق فيا في نهضاوي :) 

ويني أفلامكم و كذبكم و ذبانكم و قلة حياكم و كبركم و تكتيكم؟
أنتم حجرة عثرة قدام أي تركيز للمؤسسات

كان جيتو ديمقراطيين راكم ديمقراطيين في أرواحكم في حزبكم في مؤتمراتكم في قائماتكم! قشور الديمقراطية و الروح جاهلية عصبية قبلية! هاو مسح بيكم السيستام دبره! 

صارلكم كي العاهرة لما تكبر في العمر و معادش عندها ما تعطي، يجيبو عاهرة جديدة! ماو قلنالك ما ياخذكش، ما يعرسش بيك، راك جرد عاهرة خمم في بلادك، قلتلنا تكتيك :) كول الخراء تو! حتى لطفي زيتون ولا يستعار بيك 

مشهد مقرف!

خيرت نكون بعيد على كل خمجكم بكل أشكاله و أنواعه، نخدم بما ينفع الناس، لا تهريج لا ريق، نخدم الناس الكل، أكثر من الناس الكل، أريد الإصلاح ما إستطعت، ولا كلب ينجم يتهمني بحاجة، بتقصير، بفساد بسرقة، نحكي إيكولوجيا و رقمنة و مجلس منافسة و إحترام القانون و تكسير السيستام و الشباب.. 

اليوم يجي قلاب فيستة، سكران من زبيبة، ليثبت لمن حوله أنه قيسون أكثر من بقية القساسنة، في باله كيف يسبني في كومنتار على صفحتي، أثبت لنفسه انه من أتباع الدين الجديد :)

وراسك، لو كان على القباحة، ولد حومة عربي، قادر أسلخك انت و الي جابو والديك.
و راسك، لو كان النباح و التذبن يؤثر هنا، لأثر من سبقوك، ذبان النهضة و مخلوف و عبير.. كلهم مروا من هنا.

سأراقب إنحدارك، إنحدارك من شطر مواطن في ديمقراطية مشوهة، إلى plebe في monarchie populiste militaire ،بكل سعادة.

خلي نلخصلك،

 البرلمان بش يرجع، و كيف يرجع بش نطيشو في وجهك أمسح بيه بندقية قيسونك، سأخير الغربة في بلاد الناس على الغربة وسط عربدة الضوضاء، 3 سنوات يوما بيوم، 25 جويلية 2024، ستتذكر أنه تلاثة سنين لتالي، كان ثمة نائب شاب يحارب في الكرطالات و يحكيلك على الخضراء الرقمية و يخدم فيك نهار و ليل، جيت سبيتو على صفحته لتثبت فحولتك الوهمية و ترسكي مع الجدد زعمة زعمة، تو معادش عندك لشكون تشكي كي تتظلم كان لربك و ربع الراي إسمه تطاول على رموز الدولة، يا رمز، بكسر الراء.

سيبوا الحمام و بعد إجريو وراه، ستجرون كثيرا.

الأصدقاء و الأحباء، الناس الي تبعثلي في فرصتك توة، وتنجم تقدم و تخدم معاه..  شكرا لثقتكم :  أنا لا آكل من جثة وطن و لا من مأتم مؤسسات و لا من فضلات ما تمن به البنادق! لا أبحث عن موقع لروحي لا مع هذا لا مع غيره، عندي حلمة للبلاد موش لروحي، و الأحلام لا تزهر في مزابل الشعبويات : les mouches ne font pas du miel.

وفي الأرض مَنْأىً ، للكريم ، عن الأذى وفيها ، لمن خاف القِلى ، مُتعزَّلُ

Vive la reine!

مذكرات نائب تحت la monarchie populiste militaire
اليوم الرابع.

إرسال تعليق

أحدث أقدم