وأكد ياسين العياري في تدوينة على حسابه الشخصي بموقع التواصل الاجتماعي فايسبوك أنه استمع بإنتباه و بمرارة للقاضي أحمد صواب على إكسبراس اف ام ، يتحدث عن الضغط السياسي المسلط على المحكمة الإدارية من قبل الرئاسة، حتى لا تحكم بالعدل و القانون، بل بما يريده الرئيس و كيف أن ذلك الضغط نجح.
وأضاف العياري أنه "تابع أول بأول، كيف تجرأ الإنقلاب على محاكمة صحفي عسكريا و إيداعه السجن و التهمة كانت إلقاء قصيدة! هكذا! بكل بساطة لم يتجرأ حتى بن علي على فعلها ". وأفاد العياري بأنه لا يخفى على أحد، أن هدف الرئيس المقبل هو القضاء و القضاة، ثم الهيئات الدستورية.
وقال العياري "معلوم أيضا أن سيدنا و مولانا، لا فرق عنده بين المليون و الدينار و الشليار، المشكل سيدنا إلي نهار 14 أكتوبر هناك جلسة إستماع و حوار في الكنغرس الأمريكي حول ما حدث في تونس ومن الصعب أن يقتنعوا بأن ما قام به قيس سعيد ليس انقلاب ".
وفيما يلي نص التدوينة كاملة:
إستمعت بإنتباه و بمرارة للسيد القاضي أحمد صواب على إكسبراس فم، يتحدث عن الضغط السياسي المسلط على المحكمة الإدارية من قبل الرئاسة، حتى لا تحكم بالعدل و القانون، بل بما يريده الرئيس و كيف أن ذلك الضغط نجح.
تابعت أول بأول، كيف تجرأ الإنقلاب على محاكمة صحفي عسكريا و إيداعه السجن و التهمة : إلقاء قصيدة! هكذا! بكل بساطة.
لم يتجرأ حتى بن علي على فعلها !
أنتم أكيد لن تعودوا لما قبل 25 جويلية 2021 ذلك حلم بعيد المنال! ستعودون بخطى ثابتة حقوقيا لماي 1991 و إقتصاديا إلى ديسمبر 1986
لا يخفى على أحد، أن هدف الرئيس المقبل هو القضاء و القضاة، ثم الهيآت الدستورية.
هو قاضي القضاة و القانون و الدستور و كل المحاكم، الأخرين زايدين راو، مستعد نلقالكم مليون و 800 ألف تونسي يشهدون بهذا
وزيد راهو نظيف و لا يظلم عنده أحد : إذا أنت تطبل له فأنت نظيف كيفه و إن تجرأت على غير التطبيل فأنت مخمور جرثومة مأجور خائن .. ساهلة يعني.
إشنعملوا بيها المحاكم، تي مصروف زايد!
و زيد الهيآت الدستورية، تسرق قليلا من سلطته و هو لا يؤمن لا بالتعديل و لا بالرقابة و لا بالسلطة إلا كاملة.
معلوم أيضا أن سيدنا و مولانا، لا فرق عنده بين المليون و الدينار و الشليار.
المشكل سيدنا إلي نهار 14 أكتوبر (الموافق ل : السابع من ربيع الأول للعام ألف وأربعمائة وثلاثة وأربعون) ، ثمة جلسة إستماع و حوار في الكنغرس الأمريكاني حول ما حدث في تونس.
نتصور صعيب برشة باش يقتنعوا إنه ماهوش إنقلاب!
صحافي، نائب يتحاكموا عسكريا على آراء و يتحبسوا
قضاة تشكي من تدخلك السافر
ضربك لكل السلط و تجميعها عندك
تكسيرك لكرايم القانون
تنجم تعديها علينا، وجد كل الطغاة دائما لحاسة في هذا البلد، تعمل إش تحب، شكون بش يقول للباي غطي روحك
لكن ليهم هوما، صعيب، صعيب ياسر!
سيدنا، ممكن ياسر نخرجوا هازينك على أعناق الشرفاء (الي ما يهزكش على عنقه أكيد موش شريف) و أحنا نصيحو، قولها يا معمر قولها!
و طز في أمريكا!
لكن.. الي تعمل فيه سيأثر كثيرا على أمن تونس.
نفسرلك،
منذ 2011، المساعدات العسكرية لتونس من أمريكا فاتت مليار دولار
كيفاش نفسرلك قداش مليار دولار.. برشة برشة فلوس حاصيلو، اكثر من الأموال الي حطوها مسؤولين في حساباتهم و ستكشفهم يوما ما.
منذ 2015 تونس شريك غير عضو في الناتو.
في 1 أكتوبر 2020 (و إنت رئيس يعني) تونس و الولايات المتحدة وقعوا وثيقة تعاون على 10 سنين.
الحرب على الإرهاب ربحناها بمساعدة إستخباراتية و عسكرية أمريكية ( سلاح، مؤونة، صيانة، تدريب، تدريب مشترك، صور درون و أقمار صناعية).
هيليكبتورات البلاكهوك المزودة بالرؤية الليلية مثلت تحول دراماتيكي لصالحنا في الحرب على الإرهاب.
(كل هذه المعطيات علنية و منشورة للعموم على الأنترنات)
لو الكنغرس الأمريكي يقول إنه إنقلاب (آسف و الله لا يصدقوا التزمير، قورة سيدنا ماك تعرفهم كيفاش)، ستضطر الإدارة الأمريكية لوقف المساعدات و التعاون مع الجيش التونسي و هذا سيظر كثيرا في الحرب على الإرهاب في وضع إقليمي مشتعل : أزمة بين الجزائر و المغرب، الوضع في ليبيا يتعقد..
هذا موش تدخل في شؤونا سيدنا! هذيكا فلوس دافع الضرائب الأمريكاني شرط على حكومته ما تعطيهاش لإنقلاب! دبر فيه تره!
ما فهمتش إش مصبره عليهم جو بايدن! ياخي ما عندهمش فصل 80 و زمامر؟
أكثر من هذا، قريبا تخرج تصنيفات وضعيتنا المالية، و لن تكون آثار ما سيحدث في جلسة 14 غائبة عنها.. و زيد رانا معاليك 73 يوم بلا حكومة في مثل هذه الأوضاع المعقدة و الأزمة تتشد، فالتخفيض وارد جدا.
أنا نعرف سيدنا إنك قادر تسير العالم وحدك و ما تخلي فيه حتى مخزن حديد، هوما الحق ما إستعوبوهاش! خونة و مرتزقة نسايسوهم سيدنا لين نقضيو بيهم حاجتنا ثم صواريخنا في منصصصصصصّاتها
لا سيدنا، بالنسبة ليهم مداهمة مخزن بطاطا ماهيش إقتصاد
حتى سجعك البليغ متع مسالك التوزيع بل مسالك التجويع ما يبدل شي عندهم
تي تخيل، ما شافوش إنجازك الغير مسبوق بطلب الطماطم إنها ترخص! أكيد مأجورين سيدنا.
المشكل، راهو موش تدخل في شؤوننا! راو أحنا حاشتنا بيهم باش يسلفونا ثماش ما نرقعوا الفلوس الي ضيعوها زوز حكومات الي إنت عينتهم و صححتلهم على كل قوانينهم (و بعد قلت قابضين 150 مليون على الفصل، بما إنهم ما يتعداو كان بتصاحتك عندك الحق تطالب ببايك! الحق ما يتغشش منه حد).
مولانا، راهو كان ما تنضفش سجلك، حتى شكليا، نهار 14 قد تكون ملاحقاتك العسكرية، تدخلك في القضاء، تجميعك للسلط، أكلك للقانون و المؤسسات سبب في إنقاص كبير لجاهزية قواتنا المسلحة في مواجهة الإرهاب على المدى القريب و المتوسط و ضربة كبرى لإقتصادنا.
باهي حاول على الأقل حسن من إحترام الإجراءات، على العينين راك فضحتنا!
موش على حاجة، راهو لمصلحتك، باش تلقى شعب تحكمه، باش تلقى شكون تحاكم و تحط في الحبوسات حتى على إش يخمم بينو بين روحه (ستاج المحاكمة العسكرية على الأقوال في التلفزة و في الفايسبوك هذاكا متع الدكتاتوريات التوتو) تي لمن ستلقي سجعك البليغ كي الناس تموت بالشر؟
نصيحة أخرى، قبل نهار 14، إسمح حتى زعمة زعمة للأسيرة، سكريترتك بإمتيازات رئيس حكومة تخاطب الناس، تحكي أي كلام، حتى مسجل! خاطر ماك تعرف القورة سيدنا، مادام ما سمعوهاش حتى بالكذب، ما خاطبتش التوانسة بش يحسبوها موش موجودة!
أحنا فاهمين إنك إخترتها باش ما تكونش موجودة أما القورة عايشين في الماضي، في هاك الزمن التعيس الذي بفضلك لن نعود إليه متع فصل السلط ، مزالوا ما إستوعبوش حكمتك
أحنا متيقنين إنك الشعب و إنها حكات معاك كاينها حكات معانا الكل، أنت الشعب و الشعب أنت، أما هوما ما يفهموش!
تي إكتبلها كلمتين و تبع في المونتاج
يهديك، حاول قبل نهار 14.
مهم راو..
أخيرا سيدنا، راهو ثمة برشة كتب تتباع في تونس و موجودة على الأنترنات، متع جراثيم و مأجورين، كيما المدعو أحمد مطر و المدعو أحمد فؤاد نجم و المدعو مظفر النواب، يسبوا في الملوك المستنيرين الي لا يراقبهم و لا يحاسبهم إلا الله كيف سيادتك و ثمة شباب مغرر به يتبع فيهم، سيدنا شرايك نحميو تصحيح المسار و الإرادة الشعبية و نلموهم و نشعلوا فيهم دستور في حفلة تزميرية ؟
و السلام على من إتبع سيدنا.
يحيا سيدنا!
كيفاش إمالة؟ تصحيح مسار؟ إجراءات مؤقتة؟ سنراقب و لن نسمح؟ سنطالبه بخريطة طريق؟ :) سيب الحجل و بعد إجري وراه ..
أخيرا و أولا و دائما و في كل حين : كل التضامن المطلق الغير مشروط و دون لكن أو إحتراز مع كل مدني يتحاكم عسكريا و على ذمة عائلاتهم بكل ما أقدر (كلام جدي موش تطيير ملام).
Tags
أخبار