تقول لمياء حصريا لموقع موزاييك نيوز - مشيت له لباس على طرف وجيعة خرجت من عنده بالكوش معندك حتى فكرة على الالم النفسي كي تحس الحيوان خير منك يتحكم في حاجاته البيولوجية وانا لا..لا نجم نخرج من الدار لا نمشي نقضي لا نخدم في رمضان الجامع حرمني منه حرمني من نخرج مع صحابي من عروسات الاهل والفرحة مع الاحباب ..حرمني من عومة في البحر مع العايلة كفاه بش نعوم بالكوش ..
دفني بالحياة في التواليت..توحشت نخرج نمشي على ساقي من غير ما مخرجي يتوسخ وكل شي يهبط علي لا اراديا..توحشت نرقد في الليل منقومش مسخة والشي واصل لي لظهري خاطر التبرز لا ارادي بعد لا قطع لي عضلة الشرج..حرمني من مستقبلي وطموحاتي ضيع لي قرايتي وتعبي وسهر الليالي..ضيع لي خدمتي وشهريتي ورفعة راس امي لي كانت تتمنى تشوفني في اعلى المراتب ولات تشوفني في تواليت 24 ساعة..تبكي علي بالغصة شي قدامي شي من وراي..
سرقلي شبابي وعمري..فرحة العمر معادش نجم نتمناها كفاه بالكوش بش نعرس ..حرمني من حلم الامومة ..حرمني من حقي في الحياة..نهار لي قص لي عضلة الشرج هو نفس النهار لي سلب مني روحي..عايشة صحيح اما لي ماتو ماتو مرة وحدة..انا في النهار نموت الف مرة لاكثر من هام..الجراح مصطفى والي قتلني الاف المرات..القضية ليست خطأ طبي بل هي قتل متعمد مع سابق الاصرار والترصد.
Tags
فيديو