افتتحت قطر عرسها الرياضي العالمي مدافعة على الاسلام و اختتمتهم مدافعة عن العروبة .
و افتتحت تونس البطولة العربية لكرة اليد مدافعة عن الديسكو العربي
و من هنا يبدأ النجاح . النجاح اللي ينطلق من التشبث بالهوية . الهوية العربية الاسلامية .هويتنا و أصلنا .
كل العالم انبهر بقطر و انجازات قطر.انجازات لم تأتي صدفة ، طبعا أولى التعليقات باش تحكي عن المال و الموارد ، حيح المال قوّام الأعمال و لكن أيضا الانتماء مال و الهُوية مال و اللغة مال .
هذه الموارد اللي ضاعت من بين ايدينا وقت تجاهلنا قيمتها و تبدّلت المفاهيم. و مشا في بالنا اللي وقت تقلّد الغرب في بالك باش تولي متقدّم .ووقت تجهل لوغتك و في لغة" فغانسا" تولي موليار في بالك متطوّر.
و ضعنا بين "سامحني ما نفهمش برشة عربي" .و نحب نقرّي ولدي في ايكول فغونساز و ياخو باك فغانسا .
ماشي في بالنا اللي هذا هو التطور . و لكن يا خسارة هذا قمة الجهل و قت يتعدى بيك الوقت و تلقى روحك لاك عربي و لاك ڨاوري . لاك تونس و لا لبناني و لا تركي و لا ألماني. تلقى روحك ضايع.
تعمل المستحيل باش تولي كيفهم و في الأخير يقولوك " أرجع لأصلك " ، جرّب انوي باش تمشي لألمانيا .أول شرط يقولوك تعدي سنين تقرا و تعدي في امتحاناتهم في لوغتهم و تصرف زادة باش يرضاو عليك . وهذا هو الدفاع الصحيح على الأصل و الهوية .
و احنا نتفوخرو بلوغة الغير و أحنا مازلنا واحلين في التاء مربوطة و الا مسكّرة و الظاء تُشال و الا ما تُشالش .
قطر نجحت وقت خسرنا أحنا .على خاطر قطر خلاّت العالم يحكي على العرب و اللغة العربية و الحضارة العربية و القرآن و الاسلام و أخرتها خلات العالم يحكي على " البشت" اللي لبسو ميسي .
كل بلاد يخدموها أولادها . مسلسلاتهم تحكي عليهم و أفلامم تحكي عليهم و تسوّق لسياحتهم و حضارتهم
قطر اعتمدت على سياسة الهوية و سياحة الهوية و رياضة الهوية ، لهوية اللي ضاعت منّا ما بين تقليد و انتماء مشوّه لأمم غريبة علينا.
كلنا انبهرنا بقطر أما موش باش نعملو حتى شي .
على خاطر مازلنا باش نخسرو مليارات على مسلسل يشوّه تصويرة تونس و فيلم يكرّه الناس في تونس و ماتش كورة يوفا بكراهب مكسّرة و ضرب و مضروب. . و مازلنا باش نفتتحو مناسبات كبيرة "بالعرابن " ، فتتحت قطر عرسها الرياضي العالمي مدافعة على الاسلام و اختتمتهم مدافعة عن العروبة .
و افتتحت تونس البطولة العربية لكرة اليد مدافعة عن الديسكو العربي
بقلك محمد بن نصر
Tags
مقالات رأي