. حكاية " بنت السلطان و المكتوب "

قصص : حكاية " بنت السلطان و المكتوب "

يحكيو على سلطان، و ما سلطان إلا الله، عندو فرد بنية ما يكسب إلا هي، هاك الطفلة كبرت وزيانت وما ناقصها  كان الزواج، لكن ما خطبها حد و ما فكر فيها حد،

 السلطان تكدر و قال : ها الكل لا أمراء ، لا أولاد وزر و لا أولاد أعيان و لا أولاد تجّار تقول ما يعرفوش الّي انا عندي طفلة، وموش اي طفلة تقول للقمر ازرق ولا نزرق في بلاصتك ماشاء الله عليها خليقة وخلوق.. 

و قال حتى من الوزير متاعي ماعندوش أولاد العزّا و إلا نلزمو بيها لواحد من أولاده ..

نهار قال السلطان للوزير : "يا وزير دبّر عليا أش نعمل بنتي كبرت و  أندادها متزوجين و أنا ما حب حتى أحد يجي يخطبني فيها ؟"

قال الوزير : "يا سيدي  لا من قل ولا من ذل ...تي ما تخافش أكيد مكتوبها مازال" .. قال السلطان : تي يزّي من خرايف العزايز قالو مكتوب متاعك ..

هيا يا سيدي تعدات مدة كل يوم  السلطان يجبد الحكاية للوزير ، الوزير يقول يا سيدي مكتوبها مازال ماجاش .. حتى هاك السلطان بدأ يرجعلو شاهد العقل و يصدق في الوزير

 نهار قال : "يا وزير هيا باش نمشي نلوج ونبحث على مكتوب بنتي .. الوزير حار و قال : "كيفاه يا سيدي هو يجي منّو واحد يمشي يلوّج على مكتوب حد آخر ؟"

لكن سلطان كي يقول كلمة ماعادش يرجع فيها، و ركبو على الخيل و شدّو الثنية .. ماشين ماشين سايرين على الأرض غايرين .. حتى لين وصلو لتحت جبل يشوفو في راجل شايب لحيتو فوق صدرو كيف سبايك الفضة و في إيدو قلم و عندو أوراق يقص الورقة و يكتب فوقها كلمتين و يقول هذا مكتوب فلانة بنت فلان و ينفخ عليها يطيرها، و ياخذ ورقة أخرى و نفس الشيء و يقول هذا مكتوب فلانة بنت فلان و ينفخ عليها يطيرها .. 

وقف السلطان و قال للوزير : هذا هو الي نلوج عليه تراه إمشي إسألو على مكتوب بنتي قولو فلانة بنت السلطان الفلاني .. هبط الوزير من فوق الحصان و مشى لهاك الراجل العجوز و قالو "بربي مكتوب فلانة بنت السلطان الفلاني ؟"

هز الشايب راسو الفوق وشيع عينو للجبل و قالو : "ريت هاك المرأة العربية إللّي تجمع في الحطب هاذيكا راهي حبلة باش تولد على قريب والصغير اللي باش تولدو هذاكا مكتوب بنت السلطان" ..

رجع الوزير للسلطان و قالو يا سيدي راهو قال هاك المرأة اللي تجمع في الحطب باش تولد و ولدها باش ياخذ بنتك وهو مكتوبها، 

هاك السلطان حمار وجهو  و عرق الغضب نزل بين عينيه و قال : "شنوّا أنا السلطان الفلاني و ما أدراك بنتي ياخذها ولد مرأة عربية تجمع في الحطب في الجبل ؟

 قالو الوزير : يا سيدي مكتوب، قال السلطان يا وزير امشي أخلط عليها هاك المرأة و قصلها رأسها باش تموت و نرتاح من هالمصيبة يلّي باش تولدو و باش ياخذ بنتي و أخلط عليا وإنطلق السلطان في إتجاه القصر.

 أمر السلاطين طاعة و هاك الوزير طلع للجبل ووصل للمرأة لقاها تجمع في الحطب يجبد السيف متاعو و يضربها ضربة يقصلها رأسها ماتت، بعد ما مشى الوزير شوي حس بالذنب   وقال  بينو و بين روحو :"الله غالب السلطان حكم و أنا ما نجمش نرفض" و قال "هالمسكينة الي ماتت من غير ذنب على الأقل نرجع ندفنها باش ما تاكلهاش الذئاب و الضباع في الجبل"، و ولّي دوّر حصان متاعو و رجعلها وهو وصل حذاها و نحّى البرنوس متاعو باش يلفّها فيه في مقام الكفن و يلقى ولد صغير تحتها يبكي، قدرة ربّي في هاك الغصرة متاع الموت المرأة حضر ربّي و الملائكة و هاك الصغير خرج من المرأة حي يرزق، قال الوزير : "سبحانك يا ربّي ما أعظم شانك"، و حفر قبر دفن فيه هاك المرأة و لفّ هاك الوليّد تحت ذراعو و ركب على الحصان و إنطلق في إتجاه المدينة.

روّح طول للدار متاعو و دخل لمرتو ( هي زوجتو ما تجيبش صغار ) يصيح ومغصور وقاللها  :"يا مرا ايا صيح و قول يا رسول الله، قاتلو كيفاه ؟ قالها فيسع أطلع فوق الفرش و صيح كاينك تطلق وباش تولد وحط الطفل بجنبها بالسرقة ووقف في باب البيت ما خلى حد يدخل ونادى للخدّام و قالهم إمشو جيبو القابلة ظاهر فيها للاتكم  باش تولد، وصلت القابلة تلقى الوليد بجنب امو كاينو مازال كيف ولدتو

 قامت المتفرحات "بوق البواقين صغير في دار المشتاقين" و الناس الكل زدمت تهني وتبارك سبحان ربي بعد سنين من الحرمان مرت الوزير ولدت  صغير، و الحديث على لسان الكبير و الصغير ..

سمع السلطان بعث نادى للوزير، و قال : شنوا يا وزير بالحق زوجتك ولدت ؟ ما سمعناش بيها حبلة ؟ قال الوزير : إي نعم يا سيدي قدرة ربّي عظيمة بعد ما قريب نيأسو من أنه باش إيولي عندنا صغير و لكن في المدة الأخيرة كرشها بدات تكبر وقعدنا شاكين بالك مريضة بالك عندها لحمة وهي لا توحمت لا ظهر عليها شيء لين هاي ولدت و ما يصعب على ربّي شيء ..

و مختصر الكلام، قعد هاك الوزير  يربي في الوليّد حتى لين إحبى وإدبى و شد في الحيط و إمشى و كبر و جابلو المدّب للدار و قرى وحتى لين ولّى راجل بلغ العشرين سنة، و نهار عيد هزو الوزير معاه للسرايا باش يعيد على السلطان 

السلطان شاف ولد الوزير قال تبارك الله ربّي أش يخلق طفل سمح الخليقة و شباب وقاري وكلامو موزون تربية وزر 

نادى السلطان  الوزير على جنب و قالو "يا وزيري هيا جيب العدول وهيا نكتبو زداق ولدك  على بنتي ..وكان هكا العمل يا سيدي ليلتها ما باتو كان عروس و عروسة و متفرحات في القصر و في البلاد الكل ..

وقتها تلفت الوزير للسلطان و قالو: "يا سيدي موش قتلك مكتوب؟" .. قال السلطان: "شنوا الي مكتوب ؟" قال الوزير: "تتذكرش هاك المرأة العربية يلي قال عليها الشايب و إنت قتلي أقتلها ؟ راني قصيتلها راسها و راهو هكا ما صار وهكا ما صار وحكالو  الحكاية الكل بتفاصيل.. 

و هاك السلطان قعد باهت وقال الوزير : "المكتوب على الجبين لازم  تشوفو العين .."