عضوة هيئة الدفاع عن الشهيدين بلعيد والبراهمي: الاقامة الجبرية متجي شي قدام الارهاب الي مارسوا البحيري على القضاء

عضوة هيئة الدفاع عن الشهيدين بلعيد والبراهمي: الاقامة الجبرية متجي شي قدام الارهاب الي مارسوا البحيري على القضاء.. 

كتبت الأستاذة المحامية وعضوة هيئة الدفاع عن الشهيدين شكري والبراهمي معلقة على الاقامة الجبرية

الاقامة الجبرية ما جات شي قدام العزيز الغالي الي شويتونا عليه.

 الإقامة الجبرية ما جات شي قدام الي عاشتو هيءة الدفاع قداش من عام وما جات شي قدام الأشهر الي عداتهم بين العوينة والقرجاني يسمعوا فيهم في ملف الجهاز السري من التسعة للسبعة يوميا من ديسمبر حتى جويلية في بيرو ميترو نص في البرد على امل انهم يفدوا.

الإقامة الجبرية ما جات شي قدام التعب النفسي الي عاشتو هيءة الدفاع وقت انت تنسق مع العكرمي والعقل الاجراءي متاعكم باش ما يتحلش تحقيق وباش تعملو الحيل الاجراءية الكل باش مايتحالش الغنوشي وباش ما تتحفظش التهمة في حقو وما تقومش الهيءة على المسؤولية الخاصة ضده.

الإقامة الجبرية ما جات شي قدام التعب والضغط والملفات المخبية والمؤيدات المسروقة من الملفات ومن خزينة المحكمة وخرق القانون والتدليس. 

الإقامة الجبرية ما جات شي قدام انو كل جزئية في الملف تحارب عليها هيءة الدفاع وتمشي بيها للتعقيب وتقعد سنين  باش يتم انصافها ويرجع الملف من الاول ومايتمش تنفيذ طلبات محكمة التعقيب .

الإقامة الجبرية ما جات شي قدام أشخاص خسرت صحتها و قوتها و سكرت بيرواتها ولا عاد تعرف عيد ولا مناسبة ولا خلاعة ولا بحورات وانت تخرج تقول منين يجيبو في فلوس فوتوكوبي. 

 الإقامة الجبرية ماجات شي قدام الاعتداء على المحامين واعضاء هيءة الدفاع عن الشهيدين  وقت الي العكرمي جاب الأمن للمحكمة  وتصريحك في الليل في التلفزة انو العكرمي يطبق في القانون وانك متضامن معاه.

الإقامة الجبرية ما جات شي قدام الدم 

الإقامة الجبرية ما جات شي قدام..........

يا رب تتحل ملفاتكم الكل وتتحاسبوا .لا سماح لا دنيا لا اخرة