من وقت الي بدأ الوباء سلاحي الوحيد بش نحارب الفيروس والفاسدين في الدولة هو اني نحكيلكم الواقع كيما هو من غير ما نكذب عليكم في الباهي والا في الخايب
برشا عباد يتقلقو كي نوصف خطورة الوضع وهذا مفهوم ونعذرهم
شكون يحب يسمع خبر خايب؟
اما متأكد الي هوما بيدهم يعرفو الي هذا هو الواقع وانو الي نعمل فيه الكل ترجمة لواجب الطبيب الي من دوره يوعي و يحرص على الوقاية حتى قبل العلاج
والله ما نلومهمش
موش ساهل الي عايشينو عنا عامين
بارشا stress
بارشا تعب
بارشا خوف
العباد تعبت
العباد فدت
وقتاش تتنحى علينا ها الغمة ونرجعو لحياتنا....
خلي نفسرلكم وين وصلنا
ليوم سكرنا الشهر الثالث من الموجة السادسة الي عرفناها بموجة الاوميكرون
الموجة بدات تحديدا نهار 13 نوفمبر 2021
وقتها كان إجمالي الاصابات 715637
ليوم وصلنا ل967052 ...
بالنسبة للوفايات الله يرحمهم وينعمهم كان فما في تونس 25308 متوفي حتى نهار 13 نوفمبر
ليوم للاسف العدد الجملي وصل ل27119
معناها في ظرف ثلاثة شهور تم اكتشاف 251415 اصابة ومنهم هوما 1811 تونسي مات !!!
سامحوني الارقام والواقع يفجع وممكن باش نفاجئكم"..
لكن!
العبد لله كنت كتبت هذا عندي برشة وتنجمو ترجعو لتدويناتي في ديسمبر عطيتكم نفس الارقام
وتمنيت حساباتي الي بنيتها على واقع وعلم ومعرفة تكون غالطة لكن للأسف صار إلي قلتلكم عليه بالضبط
الله غالب ليوم صار إلي صار
انتشر الوباء في البلاد ووصل الفيروس لكل دار
الاف الرسائل توصلني و يتسائلوا شنوة جديد ؟
و اجابتي هي :
على مستوى الاصابات ال"pic" هو صار نهارة 18 جانفي وين تونس حطمت رقم قياسي ب12698 إصابة في نهار واحد
من وقتها حمدولله العدد في تراجع
توة معدل الإصابات 3081 حالة يومية وبش يزيد ينقص في الايامات الجاية
اعلى عدد متع وفايات وصلنالو كان نهار 7 فيفري 2022 وين تونس سجلت 131 متوفي في يوم واحد الله يرحمهم
متأكد الي بارشة توانسة موش شالقين ان العدد مهول لهالدرجة
موش منهم
الخبيثين في الوزارة يتبعوا في سياسة قذرة متع تزيين للارقام بش العباد ما تتفجعش وتطالب بحقها في الحياة وتقلقهم
وهذا لواش كل نهار تعطي في العدد منقوص
كل نهار تحطلنا 15، 20 وفات وقت المعدل هو في ال80 متوفي الله يرحمهم
يوم 7 فيفري 2022 الي تعدى فما إمكانية كبيرة انه يكون هو ال"pic" متع الوفيات وهذا الي نتصورو انا شخصيا
نقول إمكانية موش اكيد خاطر فما معلومات الدولة موش قاعدة تمدنا بيهم بش نجمو نجزمو
ما عندنا حتى فكرة مثلا على مدى انتشار الدلتا حاليا
نشالله يكون هذا حد الباس ويطلع بالحق نهار 7 فيفري هو ال"pic"
لأنه الايامات الأخيرة معدل الوفيات هي 60 حالة وفاة يوميا بعد ما وصلنا لل80 حالة
وقت نجيكم توة للخبر الي انا شخصيا مطمنني ويعطي الأمل
كيما تشوفوا في التصويرة الثانية تلقاو تطور عدد التكاثر الفعلي في تونس
المؤشر هذا حكيتلكم عليه برشا مرات وهو الي كل مرة يخليني نعرف قبل العباد الكل وقتاش تبدأ الموجة ووقتاش توفى
العدد هذا هو معدل قداش الفرد يعدي من شخص كي يبدأ مريض
كان فوق الواحد معناها الوباء بش ينتشر
كان اقل من الواحد معناها بش يتراجع
ليوم عدد التكاثر اقل من الواحد تحديدا Rt=0,86 😀
يعني ليوم رسميا هو نهاية الموجة السادسة
هذا هو الي مرتحني نسبيا
لأنه ليوم بش ندخلو في فترة وين الوباء بش يتراجع
صحيح هذا لا يعني نهاية الوباء ولسوء الحظ بعد مدة ستعود الكورونا في الانتشار مادام الدولة مازالت مواصلة في سياسة التعايش الاجرامية
اما ترتيحة صغيرة نتنفسو شوية قبل الموجة الجاية الله لا يقدر
نقولوا حمدولله لانه الفترة هذه
يا جماعة احنا توة نعيشوا في نوع من "الراحة الوبائية" 🙏
خسارة الدولة لتوة ما تحبش تمشي في السياسة السليمة الوحيدة الي تنجم تخرجنا من الازمة نهائيا ونرتاحو من الكورونا وموجاتها
الكورونا كانت تنجم توفى كان الدولة اتبعت سياسة الصفر كوفيد
كان عوضت لمواطنيها كان وقفت الكريديات والفاتورات وما خلاتش شعبها يختار بين المرض والجوع
وقتها ما عاد حد يمرض
وقتها ما عاد حد يموت
وقتها لاعاد فما لا موجات ولا تسكير و حلان
وقتها يرجع الإقتصاد يمشي
وقتها كانت ترجع الحياة لتونس .. و تعيش الأمل بالرسمي
#تسقط_دولة_الموت
#حجر_صحي_شامل
Tags:
أخبار