يحكو ناس بكري على عزوزة كانت ماشية عفس عليها واحد على ساڨها، صباطها تقطع قعدت تمشي وتحوّم على خياط حتى لڨت واحد دخلت ليه وڨتلو يعيش ولدي تخيطلي صباطي قالها ميسالش يا أمي كي كمل قالتلو قداش ياولدي قالها ماتعبيش روحك يا يما أما ميسالش تعمل عليا مزيا أنا راجل غريب وعازب حبيت تشوفيلي بنت الحلال قاتلو ميسالش يا ولدي قالها نقولك على شرطي من لول راني ندفع 50 مليم مهر وما حاجتي لابجهاز ولا ناس ولا تكسار الراس نبعثلك كروسة جيبيها انتي قاتلو نشوف يا ولدي ..
هيا مشت العزوزة وتخمم حتى تفكرت امرأة ارملة عندها ثلاث بنات مسكينة قليلة عايشة بخدمت الصوف هيا وبناتها.
مشت طلبت بنتها قاتلها موافقة المرأة ما ليها غير راجلها..
أيا كتبو كتابهم ونهار الجمعة جات الكروسة تلحفت العروسة وجات هيا والعزوزة وصلو للحانوت لقات الباب مشقق والحانوت حالتو حالة خرج الخياط وقال للعزوزة يايما متغيبيش علينا غدوة الصباح اجي طلي علينا.
دخل العروسة للحانوت وقالها زارتنا البركة تفظلي شافت الطفلة للحانوت لقات الكتان في كل بلاصة والاباري مرميين في الأرض مدلها كرسي حطب مكسر وجبدلها طبسي فيه شوية زيتون وطماطم وخبز وقالها تعشا.. الطفلة معجبهاش الحال. وهو قعد يكمل في الخياطة قماش وراء قماش وقالها؛ #يادرا أنا وأنتي والزمان ولا أنا والزمان وحدي.. قاتلو اووووه وحدك أنا خاطيني سكت وكمل يخيط . .
كي جا الصباح جات العزوزة قاتلو صباح الخير قالها يا يما زيدي أعملي عليا مزية هزي البنت لأمها راهي مطلقة.. فاتت 10 أيام زادت فاتت العزوزة على الخياط قالها يايما متشوفيليش مراة أخرى ،
قاتلو ياولدي أنت طلقت..
قالها العرس بالمكتوب والطلاق كيف كيف وشرطي راه كيما في الأولى خمت العزوزة وين باش تمشي وقرت تخطب الطفلة الثانية اخت الأولى زادت قبلت المرأة وكتبو كتابهم و وصلتها العجوزة للحانوت وصارلها واش صرا الأولى صرا للثانية ،
ومع الصباح خرجت مطلقة زاده فات شهر وكي العادة قالها يا يما اخطبيلي قالتلو خلاص يا ولدي مخليتلي وجه نقابل بيه المرأة بدا يلح عليها حتى رضات وقعدت تخمم لمن تمشي وقرت ترجع تخطب الثالثة بنت الإرملة ومشت ليهم قاتلها المرأة لالا هذا الراجل طلاق انا عمري معاد نمدلو
ناضت الطفلة وقاتلها يايما علاه توقفيلي قدام باب سعدي قلت امها مشفتيش خواتاتك قاتلها وأنا واش دخلني كل واحد وسعدو قبلت المرأة وجات العجوزة و وصلت الطفلة للحانوت رحب بيها الراجل وقالها على سلامتك قاتلو يسلم سيدي قالها تفظلي قالتلو يزيد فظلك جبدلها الطبسي تتعشى تقدمت وقاتلو كول تبات بلا عشاء ناض تعشى معاها وبعدها قالها يادرا أنا والزمان وأنتي ولا أنا والزمان وحدي
قاتلو علاش وحدك أنت سيدي ومولا بيتي والمال يروح والرجال تجيبو وحتى إذا خدمتك حبست أنا صنعتي في يدي نخدم الصوف وانت راجل بين الرجال ميعلم بيك حتى واحد وشنو حوالك ولا واش كليت في دارك وراه ما يدوم حال .قالها ماعندي غير هذا الحانوت الضيقة قاتلو لي يكفي واحد يكفي اثنين و الجود من الموجود هنا ناض الراجل ومشى قدام باب صغير ماكانتش شايفاتو حلو وقالها ادخلي لقات لداخل قصر كبير والخدام جوها لبسوها الحرير والذهب وجا ليها راجلها وقالها انتي لي تستاهلي كل الخير وأنت حبي وحياتي وباش نعيشك أميرة والخدام تخدم فيك
يقولو ناس بكري: المراة لي تعيش مع الراجل لازم ترضى بخيرو وشرو. وارضى بالقليل يجيك الكثيروخلي في فمك الكلمة الطيبة قبل الدونية باش تكسب راجلك.
وحكايتنا طابة طابة و العام الجاي تجينا صابة
Tags
قصص