عبد ‏اللطيف ‏العلوي ‏:"برلماننا أنظف برلمان في الدّنيا.. ‏

هذا ما دونه النائب المجمد بمجلس النواب، عبد اللطيف العلوي على صفحته الرسمية بموقع التواصل الاجتماعي فايسبوك: 

"نحبّ نبشّركم اللّي بعد الفحص والتّدقيق وتسحيح الماااصار، الحمد للّه، برلماننا طلع أنظف برلمان في الدّنيا...
لا فيه بارونات متع أدوية ولوالب فاسدة، ولا فيه شكون عندو شاحنات ومعطّل نقل الفسفاط بالقطارات ومفلّس الدّولة والsncft ولا فيه شكون عنده شركة طيران ويمكمك مع التونيسار ولا فيه شكون عندو صفقات كمّامات مشبوهة ولا فيه شكون عندو مليارات دخلت لحسابو وما يعرفش على جدّ بوها منين. 



جات ولا فيه شكون عندو قنوات تلفزيّة نهار وليل وهي تبثّ في الكراهية ولا فيه شكون يعطّل في الجلسات ورابط مع قنوات أجنبيّة ويقبض بالدّولار ولا فيه شكون عندو جمعيّات رياضيّة ويستغلّ في منصبو للبيع والشّراء ولا فيه شكون متهرّب ضريبي ولا فيه شكون يخلص على طول العام وما يحضر حتّى جلسة،


 ولا فيه شكون متحيّل على الجالية لبرّه ولاهف فلوسها ولا فيه شكون عندو تضارب مصالح، ولا فيه محامين متع فسّاد ولا فيه كناطريّه ولا شبّيحة ولا مرتشين! 


طلعوا هاك الأربعة كعبات زواولة هم الخطر الدّاهم الّذي سيفجّر الدّولة من الدّاخل، واحد باش يفجّرها بالأسلحة الشّعريّة النوويّة، وواحد باش يفجّرها بلسانه الطّويل على خاطر بوه شهيد ماعرفش يربّيه، وواحد حافظ كتاب ربّي وباش يفجّرها بالأمر بالمعروف والنّهي عن المنكر، وواحد ماهوش عاجبوا الs17 ويحبّ يفجّرها بنصرة المظلوم إذا استجار به حتّى ولو كان في المطار، وواحد باش يفجّرها بالقذف ربّي يتوب عليه، وواحد باش يفجّرها بإذاعة متع قرآن كريم ويتناطح مع الهايكا... 


يعني، الفسّاد والمافيات الكبار متع البرلمان هذوم هوما، أربعه كعبات معزولين وهانا محاصرينهم وجاري التّعامل مع الوضع بالقوّاااات تتقدّم!!! 

فيما عدا ذلك الأمور الكلّ عال العال والبرلمان هذا اللّي عطّلنا الدّستور وعملنا انقلاب باش ننظّفوه، هاكم تشوفوا... طلع برلمان ملايكة أصل، نظيف يللّش ويسّاهل جائزة "نُوفَلْ"، عفوا نُوبل لأنظف برلمان في العالم!

إرسال تعليق

أحدث أقدم

نموذج الاتصال