5حلقات و السيد يقنع في مرتو بفوائد الزواج العرفي..و في 2022 مازلنا نحكيو على أمك سالمة الدرويشة و زيد معاهم التفدليك بآيات الله المقدسة .
من جديد يطل علينا سامي الفهري بمسلسل قيل عنه الكثير .فاعتقدنا أنها المصالحة مع الدراما الحقيقية بعد ان علمنا ان أسماء كبيرة ستشارك في هذا العمل و كاستينق محترم ينتظرنا و موش كاستينق الانستاقرام . فحضرت الاسماء و في حضورها كان الغياب .
ربما الحديث عن مسلسل براءة يأخذنا للحديث عن الأهداف و طرح السؤال أين البراءة
و ما هو هو الهدف من الحديث عن الزواج العرفي ؟ شنوة الهدف من 5 حلقات و السيد يقنع في زوجتو الثانية بمرا ثالثة عالعرف؟
شنوة الهدف من محامي يُسقط كل التهم على السيد و التأكيد على المخارج القانونية لجريمة الزنا؟
شنوة الهدف من اقحام طفل صغير في "حيرة دينية" بعد وفاة بوه و قال بالحرف الواحد دعيت لربي و ما استجابش على هذاكا ماعادش نصلي؟
شكون كتب و علاش و كيفاش يتم اقحام طفل برئ في لعبة دينية مشبوهة؟
شنوة الهدف من استعمال الآيات القرآنية في مواضع لا تليق بقداسة كتاب الله ؟
شنوة الهدف من حلقة اولى لا علاقة لها بباقي الأحداث ؟
شنوة الهدف من جريمة ارهابية ينتهي الحديث عنها بانتهاء الحلقة ؟
المهم تتصور في الصيف في خلاعة و في بيسين. المهم فمة البيكيني و فمة القبلات و الأحضان ... موش مهم كيف انتهت الجريمة المهم نرى عضلات الممثل و مفاتن الزوجة و حوار القبلات .
مالهدف من تصوير ارهابي يختار شكون يقتل و يفرز؟ وقت الارهاب شمل الجميع و كيما قتل المسلم قتل غيرو ؟
مالهدف من تصوير زوجة منكسرة تتنهي كل الحلول أمامها و ترضى بالذل؟
تفسير تافه تستعملو الزوجة ...تقبل الوضع على خاطر خايفة على ولدها يعدّي في الباك...يا "مدام" أحنا ديجا رانا في الصيف و نسيبك مات في خلاعة صيف و الناس في الخلاعة و البحورات ..لا فمة لا باك و لا نوفيام .
على فكرة الزوجة هذي قادرة انها تقول لزوجها " بلّع فمك " و موش قادرة انها تكون مرا حرّة...مالهدف ؟
و قبل الختام اللي شاف فيكم الممثلين الكبار يقلي..أنا شخصيا شفت أسماء بلا روح .. و تاريخ فني بلا بريق.
حضرت الاسماء و غاب البريق....
مسلسل براءة ..لاشئ فيه برئ
مالهدف ؟
(بقلم محمد بن نصر إذاعة صوت)
Tags
مقالات رأي