سيف الدين مخلوف: رانا لاهيين بإسقاط الانقلاب إلّي دمّر البلاد..

في تدوينة نشرها على صفحته الرسمية بموقع التواصل الاجتماعي فايسبوك، رد النائب المنحل سيف الدين مخلوف، على إتهام المحامي و الكرونيكور باذاعة "ifm"    ، نجيب الدزيري، لإتلاف الكرامة بإنه هو وراء صفحة الفايسبوك التي دعت الي التدخل التركي في تونس : 


وفيما يلي نص تدوينة سيف الدين مخلوف: 
ها نجيب .. ها دزيري .. علاه هكّة هالصباح الرباح ؟؟
ماك لاباس صابح تتحكحك على ائتلاف الكرامة ؟؟
وفرحان تعمل في استوفيدة بلّي الصفحة الي تدعو لتدخل الجيش التركي تابعة لائتلاف الكرامة ؟؟ .. 
لاباس ماهو ؟؟ .. عادي تكذبوا الكذبة وتصدقوها ؟؟ ماشي في بالكم الناس بهالل كيفكم ولا شنوّة ؟؟
ولا الخبزة مرارت أكثر ماللازم ها نجيب وخيّ ؟؟


آش تحب توة ؟؟ نطلبو حق الرد على اتهامنا كذبا وزورا بالخيانة ؟؟ ولا تشوف شوية عرض من أحرار ائتلاف الكرامة كيف يعملوك تكركيرة الماشي والجاي .. ولّي يتعدى يبزق على رخصك وحقارتك إنت وبقية من في النصبة متاعكم ؟؟
ها دزيري وخي .. رانا نعرفوا بعضنا أكثر من عشرين عام عمري ما وصلتك بعيب .. وعمري ما حطيتك فاصل في مخي ولا في برامجي .. تحب توة نولّي نحكي عليك ونردّك مشهور ويزيدوك في الشهريّة متع الدور البوليسي القذر إلّي تلعب فيه ؟؟


ها دزيري وخي .. راهو السيناريو متع صفحات التلحيس للانقلاب إلّي تصنع الكذبة وتسربيهالكم باش تعلّقوا عليها وتتهموا الأحرار بالتفاهات متاعكم ثماش ما يرضى عليكم الّي يصرف عليكم .. سيناريو ڤديم جدا وتافه جدا .. وحتى الصبابة متع البوليس السياسي ما عادش يخدموا بيه .. 
ها دزيري .. هذا تنبيه علني .. ليك وللفداوي الماسط إلّي معاك .. أخطونا من بلاكم .. رانا لاهيين بإسقاط الانقلاب القروسطي إلّى تلحسولو .. ولّي دمّر البلاد وضرب كل الحريّات وحطّم كل مؤسسات الدولة وبرك عالقضاء وحاكم كل معارضيه من نواب ومحامين وصحفيين ومدونين وفلّس الدولة وعزل البلاد على العالم وحاكم الشرفاء في المحاكم العسكرية ومسيّبكم انتوما وبقيّة ميليشياتو والمرتزقة متاعو تنهشوا في أعراض الأحرار .. ويخطط لتدمير كل ما تبقالنا من الدولة .. وعدك بيه يرازيك إنت و ifm وحاتم بالحاج وكل اللحاسّة الماسطين إلّي كيفكم ..

إرسال تعليق

أحدث أقدم