بعد إنسحاب النادي البنزرتي : معز بن غربية يشن هجوما عنيفا على وديع الجريء و يدعوه لمناظرة تلفزية و يتوعد بفضح عصابته الإجرامية

وجه الثلاثاء 14 جوان، الاعلامي معز بن غربية انتقادات واسعة للطاقم التحكيمي لمباراة النادي الرياضي البنزرتي واتحاد بن قردان واعتبر ان الحكم الاول دخل الي المباراة مكلفا بمهمة واداها كما يجب.


وفي هذا السياق هاجم بن غربية رئيس جامعة كرة القدم وديع الجريء دون تسميته وقال " مولي الكرة "في تونس كيما يسميوه، يقرر لعلمكم وحده قبل ما يبدي الموسم شكون يهز البطولة و شكون يربح الكأس و شكون يطيح.


وتابع قائلا " وفاق إجرامي" كيما يسميوه رجال القانون متكون من رؤساء جمعيات و حكام و سمسارة و للأسف بعض الصحفيين! منظومة فاسدة و مقرفة و متسلطة.

وتحدى بن غربية وديع الجريء في مواجهة اعلامية مباشرة لفضح هذا الوفاق الاجرامي بكل تفاصيله و فروعه و مجرميه! وخاطب الجريء قائلا "تفضل للنزال سيدي "مولي الكرة" ان كان عندك قليل من الشجاعة! لن تفعلها لأنك لا تملك أخلاق الفرسان!".


وتأتي تدوينة بن غربية اثر انسحاب النادي البنزرتي من مسابقة كأس تونس بعد هزيمته أمام اتحاد بن قردان بضربات الجزاء، في المباراة التي احتضنها ملعب رادس بعد ان كان من المفترض أن تقام في ملعب 15 أكت بر ببنزرت.

وفيما يلي نص التدوينة كاملة كما نشرها معز بن غربية:
 

عندي سنين ما حضرتش ماتش كورة! قلت اليوم نمشي نتفرج في جمعيتي ضدإتحاد  بن قردان، بعد الي تفرجت فيه،  قررت ساقي تتقص و لا  نعاود  نحطها في ستاد متاع حاجة تتسمي عنا " كرة قدم". 


اول حاجة نحب نقول للاربيتار  متاع ماتش اليوم انه مستقبله  موش في التحكيم! و إنه  له كل المواصفات ليصبح  مليونيرا لو يقرر إعتزال التحكيم  و يولي تارزي، طريزة من نوع عالمي. الماتشاوات  اليوم ما تتربحش  بينالتي  غالط و الا تسلل وهمي،  تتلعب  بالكوارط الصفر، بالمخالفات  و بعدم  احتساب الوقت الضايع! مثالا: في الحصة الاضافية الثانية حارس مرمي CAB تضرب و قعد  3 دقايق طايح، الثانية الاخرة مخالفة واضحة و خطيرة للCAB ما تتزفرش و بعدها  التارزي يعلن نهاية المباراة من غير حتي ثانية وقت ضايع!


 كي تفهم الكرة و تعرف كواليس ما يسمي " بطولة" في بلد  العجايب تفهم انه الحكم " التارزي" دخل للمقابلة  مكلف بمهمة! أداها  كأفضل ما يكون، بإقتدار و دم بارد! و ذكاء خارق! "مولي الكرة "في تونس كيما يسميوه، يقرر لعلمكم وحده قبل ما يبدي الموسم شكون يهز البطولة و شكون يربح الكأس و شكون يطيح، " وفاق إجرامي" كيما يسميوه  رجال القانون متكون من رؤساء جمعيات و حكام و سمسارة و للأسف بعض الصحفيين! منظومة فاسدة و مقرفة و متسلطة! 


كم كنت أتمني اليوم  أن أكون رئيس جمعية CAB، كنت ننسحب من المباراة نكالة في الحكم "التارزي"و نخليه  وحدو من غير قماش! بالنسبة لاتحاد بن قردان، له مني كل التهاني بالفوز ، اما ينجم بالله واحد من ملاعبيتو   يفسرلي اي سبب يخليه  يجري يحتفل بالفوز تحت فيراج CAB،؟ أي حماقة هذه الي كانت تنجم تتسبب في كارثة؟ ملاعبية CAB , إرفعو ريوسكم، القادم أفضل. 


بالنسبة لجمهور جمعيتي الي ريتو اليوم يخليني نفتخر إنه عنا أكثر جمهور يحب و يضحي علي جمعيتو! خاطر الف مرة قلنا انه بنزرت هي CAB و CAB هي بنزرت. بالنسبة "لمولي الكرة،" أنا علي إستعداد لجولة ثانية و برنامج مباشر يواجهني فيه! ليس للحديث عن CAB و لكن لفضح هذا الوفاق الاجرامي بكل تفاصيله و فروعه و مجرميه! نعرف صعيب ياسر خاصة بعد هزيمته بالضربة القاضية في مواجهة سابقة علي قرطاج+

تفضل للنزال سيدي "مولي الكرة"  ان كان عندك قليل من الشجاعة! لن تفعلها لأنك لا تملك أخلاق الفرسان!


إرسال تعليق

أحدث أقدم

نموذج الاتصال