مؤثر جدا : رسالة من شاب تونسي إلى لمياء العروسة اللي هرب عليها زوجها ليلة زفافها..

رسالة إلى لمياء  بنت المنيهلة العروسة اللي هرب عليها راجلها ليلة العرس واختارت تكمل الحفلة وحدها
أنا #هادي_الماجري قررت نكتبلك الكلمات هاذم ونتمنى شكون يعرفها ويوصلهملها... حبيت نكتبلها خاطر بروفيلها مسكر منجمتش نعلقلها وخاصة اني شفتها كاتبة الله يرحمكم بابا وامي وان شاء الله نتلاقاو قريب



بكل حب وأخوة نقلك أرفع راسك و واجه العالم بكل قوة أنت ما خسرتش راجل... أنت خسرت كائن كان ينجم يكون نقمة في حياتك أنت ربحت راحة وحرية متتعوضش
رد بالك نهار تنكسر ولا تقول منجمش وحدي انا انسانة يتيمة... أنا ليوم حبيت نشارك معاك تجربتي في الحياة ونقلك  أنا زادة ماتو بابا وأمي فرد عام تقريبا وانا مزلت طالب مرضت بكريز في المعدة ودخلت في دوامة دواء الأعصاب تخرجت ومخدمتش وانا ولد حومة شعبية وننتمي لعائلة متوسطة خدمت كل الخدم تقريبا وما مديت يدي لحد...

 كنت مكبش في أحلامي أني مغروم بالفن ونكون ممثل مشيت لعشرات الكستينغات ورفضوني وصلت مرة صححت مسلسل ونهار بش نبدأ نصور طردوني


فكولي جوايز كنت نستحقهم وقلبوني في فلوس أجري
هذا الكل وباقي انا صامد و واقف في وجه العاصفة لين جاني النهار دخلت للمسرح الوطني ومبعد عيطولي عملت الفيلم الأول والثاني والثالث والمسلسلات وسافرت برشا دول في العالم و أصبح أسمي يتردد عند برشا ناس
أنا يا لمياء منيش خير منك أما مضعفتش وعرفت نصارع العالم ومربطتش حياتي ومستقبلي بحتى حد
آخر كلمة ليك كوني شامخة حرة قوية #امرأة_بالفم_والملا

إرسال تعليق

أحدث أقدم