ألفة يوسف : هذوما ما يحبوش ربي...اما عاملين معاه صفقة...(صور)

كتبت الأستاذة الجامعية و المفكرة و الكاتبة التونسية ألفة يوسف على صفحتها الخاصة بموقع التواصل الاجتماعي فيسبوك التدوينة التالية:

قداش من مرة، الواحد يقول من  غير ما يشعر وهو يدعي من قلبه:"يا ربي، بربي هاكالحاجة"...والا "يا رب يفضلك"، والا يا رب يعيشك ويخليك، سهل لي هاكالقضية"...

قداش من مرة، شفت عجايز يصليو بآية مكسرة، وتقريبا أغلبهم عندهم مشكلة مع سورة الإخلاص، في عوض: "ولم يكن له كفؤا  أحد"، اللي تقول: "ما كيفه حد" والا "ما زيه حد"، واللي ترحل ب:"قل هو" وتبدأ ب"الله أحد" ديراكت...

فما اللي يقول وهو متخمر: "يا رب اسخف علي" والا "سيبني عاد يا رب عييت وفديت وكليت ومليت" والا حتى: "يا رب اش عملت لك، علاش ديما الهم هابط علي"...

بعض الناس باش يقولو: الكلام هذا ما يجيش، طبعا هذوما الناس اللي يحبو ربي بالحساب وبالقياس وبالكيلو والغرام والمليمتر...والا اصلا، هذوما ما يحبوش ربي...اما عاملين معاه صفقة...اللي يحب ربي بلحق، ما يحسبش معاه...ويعبر كيف ما تحكم اللحظة...