فيديو مؤثر جدا : رباب الفرجاني تدخل في نوبة حادة من البكاء على المباشر و تكشف آخر ما قاله السعدي الزيداني قبل وفاته. (فيديو)

رباب_الفرجاني بتأثر كبير في إنطلاق برنامجها #summervibes  تنعى الراحل السعدي الزيداني:


🔷لا الاه الا الله ... سامحوني مستمعينا نتمناكم تقبلوني كيما انا اليوم بالاحساس لي نحس فيه و الا بالوجيعة لي نحس فيها .. الله غالب لازمنا نجيو نخدمو و نكونو معاكم حتى هاذيا engagement زادة .. باش نحاول نكون professionnelle اما الاحساس الله غالب يغلب برشا
🔷عشتو معانا و عرفتو الخبر متاع اليوم هو وفاة صعيبة اما لا اعتراض على حكم الله .. ان شاء الله ربي يرحمو سعدي الزيداني .. 


🔷هو اصعب احساس مش نحسو انا اليوم في الفريق الكل و الا في عائلة ديوان اف ام الكل خاتر انا كان تتفكرو و تعرفو الي السعدي موش زميل اكهو ، السعدي خو صديق و احنا خدمنا مع بعضنا 3 سنين كاملين في ديما لاباس و عملنا برشا فقرات و ضحكنا بارشا و لعبنا بارشا و بكينا بارشا 


🔷سامحونا مستمعينا احنا في الديوان الكلنا مهما كان الشخص عودناكم لي انتم عائلتنا الثانية نبرتاجو معاكم الفرحة و الحزن .. 

🔷سألت روحي كيف وصلت لهنا اش نعمل هوني معناها.. اما الله غالب لازمنا نكونو معاكم و نشكركم برشا على الميساجات لي جات اليوم و التلفونات لي وصلتنا متاع احنا واقفين معاكم في المحنة لي قاعدين تعيشو فيها اليوم 

🔷الناس لي عندها 3 سنين تسمع فينا في ديما لاباس نحكي على نوفل الورتاني ، بلال الميساوي ، سفيان الداهش ، وليد الزين كنا عائلة وحدة الحقيقة كنا نضحكو كنا نفدلكو و نعيشو معاكم في نهارنا كيفاش يكون 


🔷الي تراو فيه موش كان في الراديو اكهو اما علاقتنا راهي مستمرة ، نتقابلو ، نعملو قهيوة ، نخرجو نتفرهدو 

🔷السعدي توفى الله يرحمو و ينعمو لا اعتراض على حكم الله... 


🔷انا اصعب وحدة باش تعيش التجربة اليوم على خاطر كنا مع بعضنا الناس الكل .. سعدي كيف كان في ديما لاباس نقلو ساعات نعمل عليك سعدي اليوم انا الحقيقة ما عنديش قدرة كبيرة ، يقلي تهنى هاو سفيان هنا هاو بلال هنا و الكلنا مع بعضنا و تو تتعدى حصة باهية و بالفعل تتعدى من احسن الحصص 


🔷علاش جيت انا اليوم ؟ ديجا سألت روحي برشا أسئلة اما نتفكر وقت لي توفات زميلتنا ريم الحمروني الله يرحمها وقتها بالاحد زادة ، رجعنا نخدمو بالاثنين وقتها نوفل موجود و قصينا برشا فيديوات لي حكات فيهم ريم و غزرنا لبعضنا وقلنا كيفاش باش نكملو نخدمو ، غزر سعدي قال ميسالش حتى مستمعينا عندهم علينا حق ، هاكا علاش انا جيت اليوم 


🔷الوجيعة صعيبة اما هذيكا هي الحياة لكن مصيبة الموت توجع بارشا 


🔷نرجع نحكيلكم كيفاش سمعت الصباح ، فقت الصباح نلقى ميساجات الاولاد الكل ، سكرت التلفون و بعد رجعت حليتو و كلمت بلال الميساوي على خاطر من اقرب الناس ليا ، قتلو بلال كيفاش ، قلي أي راهو الصباح توفى


🔷كنت ديما نعيطلو سعدون و الا ابو السعود ، يقلي في بالك لي عندنا فارق عمر كبير في بالك لي انت كي بنتي نقلو ايييه و ليا الشرف نتشرف بيك بارشا..


🔷السعدي يحب بارشا الحياة يحب الناس الكل .. السعدي الناس الكل تحبو الناس الكل تقدرو و تحترمو و محلاها كي تتفكر الانسان الميت بالحاجات الباهية 


🔷ممكن اكثر حاجة مش نتوحشها و ديما نتفكر الحقيقة ديما لاباس كنت نعيطلو اسمع سعدي انت المكلف بالشؤون الخارجية متاع ديما لاباس انت وزير الشؤون الخارجية متاعنا ... ان شاء الله ربي يرحمك سعدون ، ان شاء الله مأواك الجنة .

إرسال تعليق

أحدث أقدم