Breaking

رئيس قسم الاستعجالي بمستشفى عبد الرحمان مامي بأريانة: نحب نحكي على 107 وفايات متاع البارح ما نجمتش..خاطرنا غرقنا" ‏

في تدوينة نشرها اليوم الجمعة 23 افريل 2021، على صفحته الشخصية بموقع التواصل الاجتماعي فايسبوك،  الطبيب ورئيس قسم الاستعجالي بمستشفى عبد الرحمان مامي بأريانة رفيق بوجدارية  وذلك بعد  تسجيل حصيلة مفزعة و قياسية في عدد  الوفيات بفيروس كورونا خلال الاربع والعشرين ساعة الماضية، حيث كتب يقول.


“نحب نحكي على 107 وفايات متاع البارح …ما نجمتش
حبيت نحكي على الفوضى متاع Evax ما نجتمش
حبيت نحكي على حالة التسيب والإنفلات و إنعدام الوقاية ما نجمتش.
حبيت نحكي على المستشفيات اللي ماعادش فيها فرش فارغ ..ما نجمتش

حبيت نحكي على أقسام الإستعجالي اللي تملى و تفرغ بالمرضى و عائلاتهم و الناس مرعوبة مانجمتش
حبيت نحكي على المصحات الخاصة مليانة و غالية و ما نجمتش

حبيت نحكي على التوانسة اللي إستفردت بيهم الكورونا و خنقهم القلق على بلادهم وما نجمتش
حبيت نحكي عللي كتبو FMI على تونس نهار الاربعاء ما نجمتش
حبيت نحكي على العركة بين الرئيس و الغنوشي و ما خلفتو ما نجمتش
حبيت نحكي عللى يجيش ضد القضاء العسكري و ما نجمتش

حبيت نحكي على الهيجة متاع نواب النهضة و الإئتلاف ما نجمتش
حبيت نحكي على الفقر اللي ضارب أطنابو و ما نجمتش
حبيت نحكي على الغلاء و الكوى في الأسواق و ما نجمتش
حبيت نحكي على الحكومة اللي إتونس فينا و ما هياش تطمن فينا وما نجمتش

حبيت نحكي على أحزاب حل الصرة تلقى خيط ما نجمتش
حبيت نحكي على هذا الكل خاطر غرقنا تحت هذا الكل و ماناش فايقين ولانا عازمين باش نخرجو من هالحالة ..أما الأكيد و المتأكد أنه لا يمكننا أن نواصل بها الحمل اللي يڨعڨع الجمال …برشا علينا ربي يلطف بينا و يهدينا و يجلي الغمة علينا .

هذا ونشير الي ان وزارة الصحة كانت قد اعلنت في بلاغها اليومي عن تسجيل 2205 إصابة جديدة بفيروس كورونا و 107 حالة وفاةفي تونس بتاريخ 22 افريل 2021.

Post a Comment

أحدث أقدم