قصة من الواقع : حكاية صالحة و إبن عمها.

#خرافة_الليلة

ايا يا جماعة تلمو الليلة باش نحكيلكم خرافة من قاع الخابية .....في قديم زمان يحكيو على مرا اسمها صالحة وهي صالحة بالفم والملا...جاءها مكتوبها مع ولد عمها اسمو بلڨاسم ...دخلت عروسة من نهارها رڨزلها السداية والمغزل والصوف  وقاللها : "يا بنت عمي راني ولد عمك عظم رقبتك, ما تلوحنيش وعاوني على هم الزمان كيما تعرف انا زوالي والحال على قدو"....

هاك المرا بنت أصل قالت مولى بيتي ما نخليهاش بيه...ملي تزرق للي تغيب وهي تغسل وتقردش في الصوف وتغزل وتسدي وهو يهز للسوق ويبيع ويكنز في الفلوس ....معيشها قد قد ما يعرف كان الماكلة القليلة واللحم من العيد للعيد...

يدخل يلقاها غاطسة كيف المغبونة الرحى والطابونة والخدمة وما قالت الناس والفم ساكت... يفرح ويشرح صدرو يقعد حذاها ويقلها : "كُدِّي يا بنت عمي كُدِّي والله نهار الّلي تموت نحفرلك قبرك بقادوم ذهب"

  تفرح المغبونة وتقول قداش يحبني رويجلي ...وشكون المرأة الي باش يتحفرلها قبرها بفاس ذهب كان انا يا سعدي ويا هنايا...وتزيد تغطس في النسيج لعقابات الليالي... وهو كل يوم نفس الكلام ونفس النغمة "كُدِّي يا بنت عمي كُدِّي نهار اللي  تموت نحفرلك قبرك بقادوم الذهب" ...

وتعدات السنين وهي على هاك الحال لا تشري حوايج لا ذهب  حتى تقريطة لراسها ما تطلبهاش..لا تخرج لا تدخل، لا تمشي لعروسات لا تنظف روحها حتى شعرها ما تمشطوش لين لهمها القمل والوسخ و وشيانت وضعافت وزينها ما عادش يظهر.. وسي بلڨاسم شايخ يبيع ويكنز في الفلوس ومل يوم يجيبلها كماندا جديدة..

حتى نهار فمة مرا كبيرة اسمها خالتك مسعودة الناس الكل يحبوها وياثقو فيها، تدخل للديار الكل وتخدم  حنانة وخاطبة وتغسل الموتى وتداوي رعواني..فقدتها لا تشوفها في محفل ولا في دفينة ولا في ثنية.

خالتك مسعودة لفت صحين مقروض في منديلة وقصدت دار صالحة، دزت عليها الباب باش تشوف شنوة احوالها... لقاتها في همها ووسخها قالتلها :"ووه  يا بنيتي شبيك وليت  هكا ؟" "ياخي  راجل عامل فيك ما يخليكش تشوف العباد؟"...

قالتها صالحة: " لا ياميمتي، انا لاهية نخدم على روحي ونعاون في راجلي على هم الزمان وهو الحق موش مقصر قالي كيف باش نموت باش يشري فاس ذهب يحفرلي بيه قبري"...بهتت مسعودة ولعجت عليها... وهي مرا زمنية وذكية وفهمت الداڨزة...

قالتلها: "يا مهبولة وشكون قالك يعملها بعد ما انتي تموت باش تراه انتي؟ ولو فرضنا كلامو صحيح اش تعمل بفاس ذهب وانتي عند مولاك؟ تي ماو احييني اليوم واقتلني غدوة وكان يحب يدللك علاش ما يودكش بقطيعة ذهب وحويجات تستر الوجه في عوض ها الدرابل الي لابستهم.؟ .تي والله لا من وراني انتي تموت منا وهو  يتزوج بمرا اخرى"...

صالحة عمية صمية شدت صحيح معاها وقالت الي راجلها ما يعملهاش ويحبها...

هاك العجوزة شاح ريقها وما سلمتش وكيف راتها ما في عماها طب قالتلها : "هيا نجربو ونعملو خطة" قالتلها:" كفاش يا ميمتي"؟  قالتلها مسعودة "برا ادهن وجهك بالكركم، واكبس راسك، وكيف يروح قلو راني في الغاية والنهاية مريضة في حالة وبرة ناديلي على خالتي مسعودة تجي تشوفني تعطينيش دواء وانا كيف نجيك احسب روحك متت وخليني نتصرف واقعد اسمع بوذنك"

كان العمل هكاكة بخرت بالتبن ورقدت في فرش الغبن مغربة عينيها مريضة على فرش الموت 

روح سي بالڨاسم يلقى بلاصتها وراء السداية فارغة مشالها للفرش يجري رمات عليه القاتلة وقاتلو "جيبلي خالتي مسعودة مرا كبيرة توة تعرف ما بيا وتعالجني" ..

مشا جابها قالتلو اقعد البرة عيش ولدي هاذي امور نساء توة نناديلك. هو قلبو موش حامي ياسر على مرتو خلاها حذاها ومشا للقهوة...

كيف رجع يلقى العجوزة خارجة من حبال عقلعا تبكي وتنوح وقالتلو يا وليدي البركة فيك مرتك صار الدوام لله...قلي اش نعمل انا هاني باش نغسلها وانتي برة جيب هاك القادوم الذهب وبرة حضرلها قبرها.  ..

قالها شنوة،،؟؟؟ لا عندي قادوم ذهب ولا فضة... كان تعمل عليا مزية هز ادفنها من دارك كيما تعرف عايلتي وعايلتها في بلاد بعيدة وانا وحدي نقلك الحق ما نجمش نعمللنا دفينة وفرق ..انا توة نمشي نجيبلك حصان وكريطة هزها عندك ودبر راسك...

جات الكريطة حمل هاك المرا وهي رامية القاتلة ميتة كيف ما نموتو غدوة ركبت هاك العجوزة وطارت بيها لدارها هزتها للحمام ونحاتلها ما شانها ولبستها ما زانها وقعدت ثلاثة ايام توكل وتعشعش فيها، وبعد قالتلها استناني هوني وما تحل الباب لحد هاني واصلة لراجلك باش نكمل بقية الخطة...

مشات لدار لمرا تلقى الدهانة تدهن والموبيليا القديمة قدام الباب تستنى في الروبافيكيا يجي يهزها ...

دخلت تلقى الدار مدهونة والموبيليا جديدة منصوبة وسي بلڨاسم يصول ويجول...حسبت روحها ما فاهمة شيء... 

قالتلو:" يا وليدي شنوة احوالك؟ قعد قلبي معاك بعد المرحومة ونتي وحداني جيت نطل عليك تستحقش حاجة...قاللها لا لاباس عليا، الحمد لله ... اما يا أمي الكبيرة كان تعمل مزية على ولدك تشوفلي عروسة على ذوقك السمح ...قلتلو هاذاكا الي بيك وقتاش تحب عليها  قاللها حتى اليوم ماذابيك تزربني ...

قالتلو عندي واحدة تحت يدي زينها زين اميرات اما يا وليدي شرطها غالي شوية... تحب على غربال معبي بالذهب والشرط الف دينار ..قاللها ما يهمك في شيء هاو الالف دينار في يدك،  والليلة يوصلك الغربال معبي بالذهب وزيد قلها كيف تروحلي نكتبلها فيرمة شريتها بالسرقة من المرحومة  المفيد بعد غدوة تجيبها وتجي....قالتلو باهي...

رجعت لهاك المرا المغبونة حكاتلها بالبسباس والي زرعو وقلتلها اليوم وغدوة يلزم نحضرك ونردك عروسة وخرجت قضات ما لازمها من هاك الالف دينار و حناتلها ونقشتلها وصبغتلها شعرها وزينتها بكل ما يلزم العرايس وجا سي وخينا مد غربال الذهب للعجوزة وقالتلو غدوة بعد صلاة العصر امانتك تكون عندك...

من غدوة هاك المرا صالحة ولّٓى فيها زين وعين وقفت قدام المرايا ما عرفتش روحها... لبستها هاك الذهب الكل وهبطتلها العجار على وجها كيف العرايس متاع هاك الزمان وجابت الكروسة وركبتها وهزتها لدارها

 سي بلڨاسم حل الباب  لابس جبة تعشق وبدا يرحب ويمرحب بيها وعينيه تضحك ...العجوزة رجعت على روحها وصالحة دخلت لبيت نومها ما عرفتش الدار كل شي جديد ونظافة وعطور محطوطة على الكوافوز تستنى فيها، ودنيا اخرى ...

دخل بلڨاسم وقعد بجنبها.. قالتلو نحب ندخل لبيت الراحة حاشاك...قالها ايجا نهزك انا ما تمشيش على ساقيك حطها قدام الدويريا وقعد يستنى قدام الباب هو سمع حس الماء وهو قاللها "ايه المليح مليح حتى بولو (حاشاكم) في الليالي يزقزق ويصيح" ...طفطف الهم على قلبها خرجتلو وكشفت وجها وقالتلو "انا صالحة بنت عمك يا واطي يا قبيح"  بالفجعة شهق فرد شهقة وطاح مات...

وكيف قالو ناس قبل "الرجال والزمان ما فيهم امان" وحكايتنا طابة طابة والعام الجاي تجينا صابة ..انشاء الله تكون عجبتكم ومتنسوش تخلونا تفاعلاتكم وتعليقاتكم باش نواصلوا في هاته الفقرة..... ليلتكم زينة