و كتب سمير الوافي _ فمة واحد نهار الكل يغرّد على الفنان التونسي...ويفتعل في المظلومية وفي نظرية الضحية وما فالح وشجاع كان ضد الإعلام...كل واحد يعطي رأيو وينقد فنان يخرجلو السيد هذا بالسب والشتم والتهديد الفارغ...باش يبرر وجودو كنقيب للفنانين...وهو في الحقيقة موش "نقيب الفنانين" بل "نقيب بعض الفنانين فقط" يعني اللي عندو بيهم مصلحة...والشلّة متاعو...!!!
مثلا ما يدافعش على زياد غرسة اللي تعرض مؤخرا إلى حملة تنمر وتنكيل وتجريح...وما يدافعش على الشاذلي الحاجي اللي محروم من المهرجانات ومن فرص العمل...والا على عدنان الشواشي اللي يعاني م النكران...وما يدافعش على مقداد السهيلي النقيب الحقيقي الأجرأ والأشجع...ولا على رؤوف ماهر اللي تظلم برشة وما وقفش معاه...وما نجح في تمرير حتى قانون يحمي حقوق الفنانين...وكل محاولاتو فشلت ووعودو كذبت...!!!
يعس كان على شكون ينقد جماعتو...ويتهجم على كل إعلامي ما يعجبوش رأيو...ويفتعل في معارك متاع بوز توهم الفنانين والناس أنو قاعد يخدم...لكن ما فمة حتى نتائج واقعية وحقيقية...كان العرك والحس والبوز...ما اسهلها نقيب الفايسبوك...تكتب ستاتي تشري الشبوك وانت راكش !!!
كل ما نعطي رأيي النقدي الشخصي في فنان من جماعتو والا حفلة والا عمل فني متاعهم...يخرجلي نقيب الفايسبوك يندب وينوح على الفنان التونسي المستهدف...ويوصفني بأني عدو الفنان التونسي 😅😅😅...نفس اللوبانة يلوك فيها عندو مدة باش يعمل دراما...وكأني ندعم كان في الفنانين اللي موش توانسة...كيما الفنان الموريتاني رؤوف ماهر والفنان اليمني مرتضى والفنانة البنغالية نجاة عطية وغيرهم برشة...من الفنانين اللي عمرو ما دعمهم ولا اعترفوا بيه كنقيب...ولا قدمتلهم النقابة حاجة...رغم وضعيات برشة فنانين توانسة !!!
حاصيلو خليوه يمركي نهارو...ويوهم الناس بالخدمة...خاطر ما عندو ما يعمل ولا يقدم ولا ينتج فنيا ونقابيا...غير التهجم على الإعلاميين اللي متجاهلينو...وموش باش يغيّر ولو حرف في رأيهم...مهما قال وكتب وتهجم !!!
و في رد على هذه التدوينة كتب ماهر الهمامي على صفحته الرسمية بموقع التواصل الاجتماعي فيسبوك :
مرة سألني هادي زعيم ولامني على تهجمي على انسان بطريقتي ،جاوبتو وقتلو ناخو المصعد ونهبطلو وين هو نعرفو قدرو ومستواه وبعد نعاود نرجع الي مكانتي الاصلية وتربيتي....حتى توا باش نهبطلك وين انت ونجاوبك بكل راحة.....
ياسي مسير الناقص ههههههههههههههه
،اولا انا في نقدي للاعلام والصحافيين انا مانقصدكش انت ،لانك ببساطة لست باعلامي ولاصحفي لاعندك شهادة ومستواك الدراسي نعرفوه ،تي حتى نقابة الصحافيين ماهمش مستعرفين بيك ،لهذا على الاقل كيف تكذب كذبة حاول صدقها وحدك فقط....
انت قلت الي انا نسب ونشتم ونهدد!!!!! اعطيني تدوينة تقول هذا الكل ،بالعكس انا تربيتي واصلي يمنعني وهذا اسلوبك انت وتعرفو مليح مليح....وماحاشتيش نبرر لواحد كيفك وجودي كنقيب لاني نقيب منتخب ،وانت في احدى تدويناتك كتبت عليا بالباهي وتستعرف الي انا نقيب.....
وبربي وقت تقول الي انا ندافع على شلتي!!!!! (شوف هكا الاسلوب فالكتابة عاد) نحب نعلمك انا ندافع على الناس الكل وفي اي زمان ومكان ،اما انت تقلقت وقت بديت حملتك على الكبير لطفي بوشناق ووقفتلك انا ،ونحب نعلمك صاحبك الي عمرك على لطفي بوشناق والله والله والله باعك بعد العرض بنهار ،وحصلك في مكالمة هاتفية سمعناك انا وزوز فنانين تعترف بلسانك بكل وقاحة بمااقترفته ومحاولتك البائسة لتعكير حفل افتتاح مهرجان قرطاج..
وهاني باش ناخذك على قد عقلك البسيط ،لو في دفاعي على الفنانين التونسيين لطفي بوشناق ،وصابر الرباعي ومحمد الجبالي وغيرهم اتهام لي ،فهذا احسن اتهام ،وباش نبقى واقفلك كيف الشوكة في حلقك....
اما في مايخص اتهامي اني ماندافعش على باقي الفنانين تنجم تسأل ناصر القرواشي وصلاح الطرابلسي في موضوع زياد غرسة ،وتنجم تسأل رؤف ماهر زادة بخلتش عليه مرة على حد جهدي،والفنان مقداد السهيلي كانت النقابة سباقة في تكريمه وبرمجة مسرحيته بالمسرح البلدي،والكبير الفنان الشاذلي الحاجي البارح بركا تكلمت وكتبت عليه،يعني شوف حاجة اخرى ...
ياخي جدت علينا تهجمك على راغب علامة وعلى سيدة محترمة مديرة اعماله ،انت تعرف علاش...لانك حبيت تمشي بحذاه للنزل وراغب بالحرف قال مايجينيش وماحبش يستقبلك ،خاطر فالخليج ادعيت انو فلوسك وفات وطلبت منو يخلصلك النزل ولتو لارجعتلو فلوسو ،يعني طلعت ماكش ثيقة ،هذا علاش ماعادش يحب يستقبلك ياخي دورتها تهاجم فيه ،كيف ماعملت مع الفنان صابر الرباعي ماجاكش لعرسك لتوا تهاجم فيه....انا راني ننصحك مانتقربش سيب عليك مني لاني المرة الجاية نهبطلك محادثاتك المكتوبة والمسموعة في تهجمك على الفنانين التونسيين....
و رد سمير الوافي على ذلك بأنه سوف بتوجه للقضاء :
غدا سأرفع قضية ضد " نقيب بعض الفنانين " الذي أجاب حرفيا عن كل تفاصيل ما كتبت وتم نشر ذلك في بعض المواقع مع ذكر إسمي مما يؤكد أنه يقصدني بالرد ( حتى لا ينكر )...وعندي تسجيل صوتي يتحدث فيه عن ذلك أيضا...
وسأطالبه أمام القضاء بإثبات ما إدعاه...وتوضيح مصدره حتى يُحاسب معه...وسأطالب بإستدعاء شهود على ذلك لهم علاقة بالموضوع لمد القضاء بما يثبت ذلك إذا إدعوا أنه صحيح أو تكذيبه قانونيا...وأتحداه أن ينشر هو أو غيره دليلا واحدا ولو بسيطا على إدعاءاته...أو حتى على أنني زرت دولة خليجية في العشرة سنوات الأخيرة...!!!
محاولة التشويه الفاشلة لن تمر بلا حساب...بالقانون...!
و منذ قليل نشر ماهر الهمامي تدوينة قال فيها انه قام بحذف التدوينة الخاصة بسمير الوافي، بناء على تدخل من الفنان رؤوف ماهر : وفيما يلي نص التدوينة :
بعد تدخل من الفنان الخلوق رؤوف ماهر وتقديرا له حذفت تدوينتي الاخيرة والخاصة بسمير الوافي ،وانا لست بشرير او عدائي ،اناتدفعني غيرتي على الموسيقيين والفنانين ،لست في خصام شخصي مع سمير الوافي الذي اكن له كل الاحترام والتقدير....
و بدوره كتب سمير الوافي :
تدخل الصديق العزيز الفنان رؤوف ماهر بثقله في قلبي ومكانته عندي...وكواسطة خير بيني وبين نقيب الفنانين ماهر الهمامي...لتطويق الخلاف وتجنب التصعيد...وقد سبقني ماهر الهمامي وحذف ما كتبه عني وأعتبر ذلك تراجعا عن إدعاءاته وإعترافا بتسرعه...وخاطر رؤوف عزيز وغالي عندي ولا أرد له طلبا رغم حجم الإساءة والإدعاءات الباطلة...
لذلك وبقلب أبيض حذفت ردي على ما كتبه ماهر الهمامي...وأرجو أن يتوقف السجال هنا " في خاطر الرجال " كما نقول في ميثاق الأخلاق والرجولة والشهامة...ولا مشكلة شخصية بيني وبين ماهر الهمامي الذي أحترم شخصه وحدود مهمته...
وأرجو أن يحترم حدود دوري ومساحة حريتي...ويكون الإحترام متبادلا بيننا في قادم الأيام...
Tags
منوعات