احمد كان حريفي بعد الثورة
و بعدها ولينا أصحاب
كيف وقف قدام القاضية
بعد الثورة ما كانش معروف برشة
قلتلها : سيد الرئيس هذا متع " حوماني" ... تبسمت ( كانت مرا طيبة و حنونة ) قتلي لا استاذ موش هذا متع حوماني...حوماني متع الحمزاوي...قلتلها " ماو هذا الي ورا الحكاية الكل " عيطتلو و قتلو عيش ولدي ما تقعدش في الضل عرف بروحك ....."
بعد مدة تقابلت انا وياه قلي استاذ شنوة تقصد القاضية قتلو " الكلام الي قالتهولك انا نحب نقولهولك و نتصور الناس الكل يخممو كيفها ... اخرج كافون و عرف بروحك انت موهوب ما تدفنش روحك .. " قالي "نحشم" قتلو " اخرج مرة للاعلام تو تتنحى الحشمة " وافق .. و بعد مدة شفتو في الحوار التونسي ...تكلم ...و ضحك .. و غنى .. و حبوه التوانسة و ولى محبوب و معروف ..
قعد ديما يكلمني و يستشيرني في برشة حاجات و ولى صحاب مع عائلتي ..و ولى يكلم امي يرحمها و ساعات يتعدى بحذاها و هي مريضة يطمن عليها و الا يكلمها يسأل عليها و تقلي هي "يا منير راهو كافون كلمني" .. احمد ياسر طيب و ياسر زوالي و عندو برشة حاجات خلات الناس تحبو
.. و انا زادا
نحبو برشة
ربي يرحمو
و يرزقو الجنة
و يصبر عايلتو
Tags
منوعات