المدوّنة أمينة منصور لرئيس الجمهورية: ما نجّمش نساندك كيف كل ما تخرج نراك هايض ومتغشش..الإقامات الجبرية علاش وجماعة النهبة وقتاش؟

كتبت المدونة والناشطة أمينة منصور:

إمشي واسكت كان يقولهالي بابا يرحمو باش يستفزني و أنا صغيرة بلكل .. نبركلو في الكياس .. يولي يضحك.

أنا لا عندي مصدر رفيع المستوى في قرطاج يسربلي في المعلومات و يعملي في حملات تفسيرية على الواتس اب .. و لا تجيني تقارير محكمة المحاسبات قبل ما تتطبع

ما نجمش نساند من غير ما نفهم … علاش وكيفاش

ما نجمش نساند كيف كل ما تخرج نراك هايض و متغشش. ما عنديش ثقة في القرارات وقت الغضب

ما نجمش نساند كيف عمري ما ريتك مبتسم ولا متفائل

ما نجمش نساند كيف من دستور كامل ملغم تختار الفصل 6 باش تتحكك عليه

ما نجمش نساند كيف تحقرني و ما تعلليش قراراتك وإعفاءتك و اقاماتك الجبرية ( الي لحد توة وزف )

إعفاء وزير الدفاع ( الي أنت الي عينتو) علاش؟؟ وكيل الدولة العام للقضاء العسكري ( رغم الي هو من أثار الدعوى ضدي ) علاش ؟؟

الاقامات الجبرية ؟؟ شنية التهم متاعهم الناس هاكم ؟؟ ( رغم الي بالنسبة ليا فيهم ناس أعداء على المستوى الشخصي ) .. أما لا نحب نفهم .. و علاش هوما و غيرهم مازال يرتع

الولات علاش بالتقسيط ؟؟ و شنوما les critères متع الإعفاء؟

الميزانية متع 2022 كيفاش ؟؟

جماعة النهبة وقتاش ؟؟

الجمعيات المشبوهة وقتاش ؟؟

علاش تحبني نثيقك ؟؟ و أنت مقسمنا نحن وهم وكل ما خالفك الرأي خائن و مرتزق و بيه و عليه

ما نجمش نساند مادام لحد توة مانيش محسوبة مواطنة

اي أنا مواطنة .. لا هايشة و لا رعية

نمشي لجهنم بساقيا و بكيفي و ما يقودني حد للجنة بالسلاسل ..

تونس متاعنا كيما هي متاعكم .. ملك مشترك .. ماناش خماسة

مع هذا الكل .. من قلبي تمنى تنجح … خاطر في نجاحك . نجاح للبلاد و للعباد و لينا الكل

و انشاء الله ما يتظلم حد