القاضية كلثوم كنو تعلق على مشروع الدستور الجديد..التفاصيل.!

في تعليق على مشروع الدستور الجديد، قالت القاضية كلثوم كنو معلقة على الفصل الرابع و الأربعون من الدستور .."تربية الناشئة على القيم العربية الاسلامية  وعلاش موش تربية الناشئة على القيم الانسانية. 

وفي تدوينة اخرى نشرتها على صفحتها الرسمية بموقع التواصل الاجتماعي فيسبوك، قالت القاضية كلثوم كنّو:

محكمة دستورية   اولا  من حيث التركيبة 

الاقتصار على 3 أقدم رؤساء دوائر بمحكمة التعقيب و3 رؤساء دوائر تعقيبية بالمحكمة الادارية و3 أقدم اعضاء بمحكمة المحاسبات   . موش حاجة باهيا .

 راهو  تنجم تكون  قاضي قديم اما ما عندكش تكوين باهي في  القانون الدستوري   وبربي ما تقوليش القاضي يعرف كل شي   .  راهو ينجم قاضي  أقل سنوات عمل من قاضي ٱخر و يفهم خير  منه في القانون الدستوري   .

حاجة أخرى ومهمة برشا  النص يقول كيف يوصل القاضي بالمحكمة  الدستورية لسن التقاعد يعوضوامن يليه في الأقدمية  بشرط أن لا تقل فترة النيابة متاعه سنة  كاملة.

في التطبيق  باش نلقاو رواحنا  نهار نهارين والتركيبة تتبدل    هاو علاش خاطر كيف يشترط الأقدمية  باش نلقاو  الي على أبواب التقاعد هوما الي باش يكونو  أعضاء في المحكمة الدستورية . يبقى عام ويخرج وقتها نجمو في عام واحد يتغيرو ثلاثة أو أربعة 

تعرفوش النتيجة شنية ؟؟؟؟فقه 

  ما عادش يصبح عندنا فقه قضاء دستوري مستقر   .باش يكون على كل يوم يا كريمة.

ما يزيش  القضاة  ما يشترطش فيهم الكفاءة في المجال الدستوري   وزيد السيد رئيس الجمهورية كتب الدستور وحدو وما فماش اعمال تحضيرية يرجعولها قضاة المحكمة الد ستورية  وزيد  التغير في التركيبة وعدم استقرارها لفترة  باش نلقاو رواحنا كل نهار نهارين قدام تأول وقدام اتجاه   هذا اذا  فما اتجاه من أصله .

#  الحاصل محكمة دستورية   عندكش عندي

# مانيش نقص من قيمة القضاة  اما راهي الحقيقة.