نبيل حجي :" الزوالي، موسم التخفيضات، الاسعار، وزارة التجارة... الكذبة الكبرى.

نشر منذ قليل، القيادي بحزب التيار الديمقراطي، و النائب بالبرلمان المنحل، نبيل حجي، على صفحته الرسمية بموقع التواصل الاجتماعي فيسبوك، التدوينة التالية :

نبيل حجي :" الزوالي، موسم التخفيضات، الاسعار، وزارة التجارة... الكذبة الكبرى.

بما انها فترة التخفيضات الصيفية، الجمعة اللي فاتت عملت دورة على عديد المحلات التجارية (ملابس و احذية). كل المحلات تشير على فتريناتها انها دخلت في التخفيض الثاني 2ème demarque.

قلت خليني نشوف هالتخفيض الثاني اش فيه ؟ لعلي نلقى حاجة باهية بسوم معقول.

على الفترينة يكتبولك : تخفيض يصل الى غاية خمسين في المائة. فمة شكون كاتب يوصل لسبعين في المائة.

طبعا بالصغير بالكل يكتبولك، 20، 30 و 40 بالمائة. اما الكتيبة هاذي ما تراها كان كي تلصق للفترينة.

ايا، تصدق الحكاية و تدخل للمحل.

القطعة اللي فيها الضو، تلقى مكتوب عليها nouvelle collection

البقية، كان طارت 30 بالمائة تخفيض ... و ما فيها ما يتلبس، او مقاسات من xxl و انتي طالع.

كي تلقى قطعة فيها تخفيض 50 بالمائة، و تجي قدك، فمة امكانية كبيرة تكون شراو منها عشرة انفار منذ وضعت للبيع اول مرة ... يعني في الفريب ما تتباعش.

دخلت لمحل بيع أحذية فيه علامات أجنبية بالسوم الفلاني. نلقى فقط 5 موديلات احذية رجال معروضة للبيع بالتخفيضات. 

الصولد في الخارج : تمشي تقمر قطعة نهار قبل الصولد. من غدوة تلقاها تخفيض عشرين بالمائة، بعد جمعة اربعين، و بعد جمعة سبعين. (حاجة جربتها ما حكاوهاليش).

طبعا في تونس، الكلام هذا لكل، من غير ما نحكيو على التلاعب بالسعر الأصلي قبل تفعيل التخفيض.

و طبعا، في الاثناء، وزارة التجارة، و منذ عقوووود، تكتفي بتحديد تاريخ بداية موسم التخفيضات و نهايته ... و الباقي ارفس كيما تحب.