زكريا بوقيرة في تدوينة مؤثرة لريم الرياحي :" لا ريم مش إنت إلي تمسخت.. هاذم الي تمسخوا.. "

 زكريا_بوڨيرة في تدوينة مساندة لريم الرياحي  بعد ظهورها التلفزي ليلة البارحة في برنامج فكرة سامي الفهري على قناة الحوار التونسي، حيث كتب على صفحته الرسمية بموقع التواصل الاجتماعي فايسبوك ما يلي :


"عنا برشة مشاكل في تونس
أما ممكن أخطرهم هي قلة التربية ونكران الجميل
قبل ما تصيرلها المشكلة كان فما شبه إجماع على ريم الرياحي في المجتمع التونسي مش من عدم خاطرها ذكية, خاطرها متربية, خاطرها جميلة, خاطرها رزينة, خاطرها حساسة ..

من الاخر خاطرها  فنانة حقيقية خلطت مستنا الكل ونتشرفو بيها قدام العالم هذا كان قبل أوت 2022  خاطر كي طاحت في بقعة ما تلقى جمهورها والعباد إلي دخلتلهم الفرحة لديارهم معاها ،نفس العباد هذوكم تلذذو من مصائبها
خرجوا الخيوبية والشر إلي فيهم كل نهار ينهشولها في لحمها وهي ساكتة كل نهار يسلخو فيها بتظوميرهم ومصاطتهم وهي ساكتة آلاف التدوينات خرجوهم واتهموها بأبشع النعوت  وهذا الكل وهي ساكتة البارح خرجت وحكات والغصة في قلبها حكات على الوجيعة متاعها حكات على الظلم والخيانة حكات على التضحيات إلي تجبرت عليهم
لإخر دقيقة قعدت قوية وشامخة لإخر دقيقة ما خلاتش كارهيها يفرحوا بدمعتها العزيزة..ما نفهمش منين جابت القوة


البارح ريم بش تفسر علاش رصاتلها تتخلى على الحضانة متع صغارها قالت "أنا مرا تمسخت وما عادش نجم نوصل صغاري للمكتب"


إلي تمسخ هو هذا المجتمع المنافق الكذاب الخائن المغيار والجبان وقتاش بش نتعلمو نتلهاو في حوايجنا ؟ وقتاش نتعلمو نسيبو حياة وأعراض الناس؟ وقتاش نتعلمو نيزيو من كلامنا المرزي إلي يوجع ويحطم العباد؟
عيب عليكم 
عيب كبير
نشالله نهار تتعلمو وتوصلو لظفر الشرف متع ريم الرياحي"

إرسال تعليق

أحدث أقدم

نموذج الاتصال