يحكيو بكري على راجل ماخذ مرا على نياتها وقلبها طيب اللي في قلبها على لسانها و اللي على لسان الغير تصدقو وذنيها ......الراجل خدام حزام :نهار تصيب وعشرة تخيب وماشية وحالتو ترجع لتالي .... صبح اللي يخدم بيه ياربي يحصل بيه وقية زيت والا مغرفة دهان (سمن) يجيبهالها تتعشاها معاه..... النفس تمل وتتشهى ....نشهيكم في الجنة ويعطي ربي لكل قلب ما يتمنى.
ايا سيدي للة فلانة ملت مالخبز والزيت والدهان و الراجل عارف عقلها على قدو قالتلو ياراجل قلبي طاب مالزيت والدهان ...شاهية لحيمة وشحيمة قاللها هذا اللي بيك غدوة الحي نجيبلك هبرة لحم ونصغرلك العظم ونزيد معاهم طرف خضرة وغلة ونشبع مولات بيتي ،
صبحت المرا سارية الضحكة معبية الفم ومشمرة الكم تخمل في الدار ....هو فرحها بكلمة وهي فوحتها عند الجيران راجلي اليوم يجيبلي اللحم حضرت البرمة وشعلت الفحم وقعدت تستنى فيه يدخل بالخير والخمير....عشات العشية...طاح الليل ......
دخل و في يدو صحفة زيت قالتلو وينو اللحم قاللها انا خممت ودورتها في راسي قلت مولات بيتي تستحق ماخير ماللحم راني نويت صوارد اللحم نشريلك بيهم بلالط سمحين يستاهلو هاك الوذنينرقدت المخلوقة وهي الفرحة مش سايعتها....
طلع النهار لمت الدار ودارت عليهم جار جار اليوم مولى بيتي جايبلي الذهب وقالت لجارتها نقبتلها وذنيها وقعدت في العتبة تستنى فيه...... حتى جاء وفي يديه وقية سمن قالتلو وينو الذهب
قاللها نويتها وخرجت من فمي لكن قلت عزيزتي وعشيرتي نشريلها دويرة تتكسل وتمد سويقاتها فيها و تتهنى مالعوج و الضيق ....جد عليها مسكينة وباتت حية للصباح .....غير ضوى الفجر بدات تلم في الدبش و ربطت وحزمت وع الجيران سلمتوجات قدام الباب و بمبرت ......
المغرب اذن و الرويجل جاي من بعيد شافها هكاكة..... رجع على ثنيتو .... ماعرفش منين يلمها مسكين مالدنيا والا من ه المخلوقة النية البوهالية......
قعد قدام جامع وهبط راسو ويخمم .....جاه واحد سألو... حكالو اللي فمة... كيفاش مرتو كل يوم تطلب حاجة وموش فاهمة انو هو على قد الحال .....ايا دبر عليه صاحبو قالو"كي فديت منها انا نعطيك الحل ....فمة واحد يبيع في دار....لكن المشكل ساكنتها جنية (حاشا من يسمع) اللي يدخل تخرجو وسومها قليل : تسوى كان دينار ....منها توفي بكلمتك ومنها تتهنى منها
صبح الرويجل شاري الدار و رجع لمرتو كرى حمال وهز الدبش ....دوب وصلها لفم الباب قاللها ادخلي نضمي الدبش انا راني ماشي نجيبلك وحدة تعاونك مشى قعد وراء حيط ويستنى في الكارثة......
مولاة النية دخلت وبدات تنظف في الدار هكاك حتى سمعت صوت يخوف .....بسم الله الرحمن الرحيم تلفتت تلقاها الجنية ...ظنتها المرا اللي بعثها راجلها باش تعاونها .....قالتها" يعطيك الربح هذا وقت لعب؟؟؟! ماتعرفيش تسلمي ؟؟؟ ايجي ايجي نبوسك وهيا نبداو القضية ويزي مالتدرويش
الجنية بقات مصدومة من تصرف المرا وعاودت عيطت بصوت اقوى و تدور لها مولات النية بكف قلبتلها خليقتها حاشاكم قالتلها بعثك راجلي تعاونيني شمري على ذرعيك لا نربيك.... ما خلصكش راجلي كروية تنظفي وبلا مزية"
الجنية مسكينة خافت و بدأت تسلت وتكلت في الدار لانو هوما اللي مايخافش منهم يصبحو تحت امرو.... هاك الجنية تخدم وتعاون في مولات النية حتى طاحو اكتافها .... ولات قالتلها اعتقني مالتعب ونعطيك جرة ذهب.... ضحكت مولاة النية وقالتلها "هههه ....مليح. ...كي تعطيهالي تلقى الخير"
في رمشة عين حطتلها جرة ذهب وطارت.....
خرجت مولاة النية شرات اللحم والفاكية و قطيعات ذهب وروحت قعدت تستنى في راجلها كيف العادة ......مع المغرب قال نروح نشوفها اش صار فيها ...... وغير وصل للدار تضربو ريحة اللحم ويلقاها لابسة و زاهية .... قالتلو 'المرا اللي بعثتها تعاونني على الدار عطاتني جرة لويز....
. تبسم وقاللها " بالحق ... مولى النية اذا ماربح يسلك على خير.... وولد الاصل لوكان توكلو زيت حافي يصونك وقليل الاصل لوكان تعطيه لحم اكتافك يخونك"
صفي قلبك وامشي بالنية تتقضالك امور مخفية.... واذا ماربحت مع المخلوق تربح مع الخالق .....
Tags:
منوعات
