قصة من الواقع : الأصدقاء

#خرافة_الليلة : 

■هذا ياسيدي بن سيدي خرافة الليلة على زوز صحاب صحبتهم قعدت فترة طويلة لين جاء نهار من النهارات تفارقوا   واحد منهم  سافر لارض الله الواسعة تزوج في هاك البلاد وعمل عيلة وانقطعت اخبارهم على بعضهم

.برا يا زمان و ايجا يا زمان اهو المسافر روح لبلادو بعد  سنين  طويييييلة وتفكر صاحبو  قال يا  لندرا شني اخبارو  نلوج وننشد على حالو وأحواله قول هز روحو يمشي وينشد لين وصل.

 وين وصل لجماعة من معارفو  قالولو صاحبك توفى  توا سنين وعقب ثلاثة اولاد والثلاثة متزوجين وكل واحد بدارو  نشد على ديارهم نعتوه..  مشى دق على  الاول السلام عليكم عليكم السلام  انى اسمي فلان وصاحب المرحوم بوك وبيناتنا عيش وملح وأيام ما تنتساش يا وليدي لكن فرقتنا الأيام و  اللى هدا مشي فى حالو وتوه روحت للبلاد وقلت  خلي نفركس عليه سمعت بيه توفى  وعقب ثلاثة وليدات قلت خلى انشم ريحة المرحوم بشوفتكم..

 قالو الولد وصلت وبويا الله يرحمو كان ديمة يحكي عليك ويذكر فيك بالخير طبعا الولد ولى راجل وحتى من الرأس شايب قول دخل هاك  الشويباني  والوقت كان متاخر شوي ..قام الراجل لمرتو هيا وين العشى الضيف  صاحب بابا الله يرحمو من زمان وجاي من سفر.. قالتلو وكان صاحب بوك حاجة والله كبيرة  جايني في هالوقت ماعندي مانعشيكم..

قعد هو وياها يتخاصموا وهاك الشويباني صاحب بوه يسمع فيها تقولو  يرقد ويسكت

ما نطولش عليكم الراجل اتصرف وجاب للضيف تعشى ورقدوا وفاقو الصباح وهاك  الشويباني يقول  للراجل  ياوليدي انعتني على دار خوك الثاني نتعرف عليه..  أيا نعتو  مشالو دق الباب  السلام عليكم عليكم السلام  اني فلان صاحب بوك وحكالو القصة قالو الراجل وصلت.. دخلو لدارو  والشيباني يشوف لهاكا الراجل حتى هو شعرو مصفي شيب ولحيتو بيضاء وباين عليه مهموم كي خوه  أيا حظر الفطور  ناض الراجل صاحب الدار للمرا هيا وين الغدى  كشت في وجهو وقالتلو غدى شني اللي تحكي عليه ؟؟؟؟ شنو نوكلو عظامي والا  جايبو مشكل وملون..؟  كانك جايب قضية و الا لحم ادخل خرجها..

الشيباني يسمع فيهم وهضاك الراجل يخضار ويصفار وفِي الأخير اتصرف وحدو وجاب للضيف ماكتب الله  بات الضيف معاهم..

من غدو الحي الصباح قالو يا  ولدي انعتني على دار خوك الثالث نتعرف عليه..  نعتو  وطول الطريق يكلم في روحو وواجعو حال الوليدات وشنو صاير فيهم  ويقول زعمة حتى خوهم الثالث كيفهم؟ يمشي ويخمم يمشي ويخمم لين وصل  دق الباب  السلام عليكم وعليكم السلام انا صاحب بوك وحكالو القصة، 

  قام هاكا الراجل يرحب ويهلهل تفضل مرحبتين بيك والشيباني يمقل في  وجه ولد صاحبه الشعر اسود وشكلو  متهني والضحكة ما فارقتش وجهو   فرح هاك الراجل بصاحب بوه قعدو يحكيو والشيباني استاسع خاطرو وقعد يحكيلو على صحبتو مع بوه وقداش كأنو راسين في شاشية لين تفارقوا.. وهاك المرا من لي قالها  راجلها هذا صاحب بويا فرحت وقالت الله الله على ريحة المرحوم وكأنه بوك قام حي.. و بدت كل مرة  تجيب حاجه  من غير قول  عارفه شنو يلزم الضيف.. ولو ان الحالة المادية كيفها كيف حالة الاول والثاني..

المهم تغدوا وتبحبحوا وعداو النهار كلو في الحديث والضحك وكانهم يعرفوا بعضهم من زمان فرحوا بيه وفرح بيهم بات و من غدوة الحي..  وين جي يتسقد الشيباني قال  للراجل :  نحب نسالك ياولدي وتجاوبني بصراحه قاله : 

تفضل..  قاله : قولي  انت الصغير في أخوتك؟؟ 

ضحك الراجل وقاله انا الكبير فيهم   والكبير الله و يلي  مشيتله الاول هو الصغير والتاني هو الوسطاني

زاد استغرب الشيباني.. خمم خمم وقال في نفسو:

■الله على الدنيا  تاريته  الكبر مش بالعمر

■الكبر بالهم  والنساوين بخوت 

■فمة اللي لا تستحي ولا تتحشم ومش مهنية راجلها  ■وفمة اللي بنت ناس مقومه عاقله ورزينه وتعرف القدر وحدها...