زكريا ‏بوقيرة ‏: إلي جاينا صعيب برشى" و رمضان السنة بش يتعدى صعيب على الآف العايلات ‏التوانسة". ‏

هذا ما دونه الدكتور زكريا بوقيرة منذ قليل على صفحته الرسمية بموقع التواصل الاجتماعي فايسبوك:

شهر رمضان مجعول قبل كل شيء بش نخمموا في الضعفاء، في العباد إلي ما عندهمش نفس الحض متاعنا، العباد إلي الدنيا معاهم صعيبة، رمضان ألسنة بش يتعدى صعيب على الآف العايلات إلي المرض خطفلهم أعز الناس إلي عندهم. 

خممو في الآف الكراسي إلي بش تقعد فارغة في طاولة شقان الفطر،خممو في الصغار إلي تحرمو من ضحكت بوهم، خممو في إلي الأولاد تحرمو من بوست أمهم، خممو في الرجال إلي تحرمو من حنين نساهم، خممو في النساء إلي تحرمو من دفء رجالهم، خممو في الوالدين إلي تحرمو من ولادهم معنى حياتهم

رمضان ألسنة صعيب على برشة توانسة، كان إنت محضوض وما خسرت حد من عايلتك كون شالق بالنعمة إلي إنت فيها غيرك يدفعو مال الدنية الكل بش يرجعو إلي فقدوهم

حرام والله حرام، تي هذا هو أكبر حرام، حرام إلي عملوه فينا المسؤلين إلي آمنهم حياتنا وحياة عايلاتنا، حرام الحزن والألم إلي دخلوهم في ديار الناس، حرام الوجيعة إلي سلطوها على قلوب الناس، حرام الدموع إلي سالت مالقهر والظلم

خسارة هذا الكل كنا نجمو نتجنبوه كان جاو إلي يحكموا فينا عندهم ربع غرام إنسانية، حتى شي توا ما ينجم يرجعلنا خواتنا إلي ماتوا أما على الأقل نجمو نمنعو إلي قعدوا، ما فما شي في الدنيا هذي أغلى من حياة الإنسان ما نخليوش السياسيين يزيدوا يفكوا منا حبابنا،كي نقول حجر صحي برشة عباد تخاف على قوتها وقوت صغارها أما رهو حقنا أنو دولتنا تتلهى بينا وتخلصنا بش نشدو ديارنا وتحمينا. 

ردوا بالكم على رواحكم وعلى عايلاتكم، إلي جاينا صعيب برشى، ربي يحميكم من أي مكروه

#رمضانكم_مبروك

#حياة_الناس_قبل_كل_شي

#حجر_صحي_شامل