و دعا الدكتور بوقيرة في ذات التدوينة التي أرفقها برسم بياني الي ضرورة الحجر الصحي الشامل لمدة لمدة ثلاثة أربعة اسابيع.
وفيما يلي نص التدوينة :
أحنا توا وين وشنوة يستنا فينا؟
سؤال برشا يسألو فيه وبالطبيعة ما نجموش نعملو على الدولة واكذيبها
تبعوني بش نحاول نفسرلكم وين وصلنا
نبداو بالتصويرة الكبيرة
نحنا توة في سادس موجة متع وباء كورونا (للدولة هذه الخامسة)
الاولى صارت في ربيع 2020 كانت الوحيدة الي عملنا فيها الي لازمو يصير
سكرنا الحدود حطينا حجر اجباري على الوافدين وعملنا حجر صحي شامل صحيح صعيب ولكن بفضل تضحيات الشعب رجعنا للصفر حالة وعدينا احسن صيف في تاريخ تونس
كنا فخورين بروحنا وببلادنا وكنا ندزو في اكتافنا على العالم كيفاش نحنا عنا 50 ميت وفرنسا وقتها فيه 30 الف وفاة
خسارة الحلمة هذه متع الدولة الي تحمي شعبها ما دامتش برشا وفيسع ما رجعت حليمة الي عادتها القديمة
من 27 جوان 2020 انتهجت الدولة سياسة لا انسانية سياسة إجرامية الي فيها الروح البشرية ما تسوى شيء
السياسة هذه اسمها على جسمها
"مناعة القطيع"
معناها حشاكم نحنا قطيع متع حيوانات خلاو الفيروس يتفشى فينا وخطف منا أغلى ما عنا
بدات الموجة الثانية ومن وقتها ما وفاتش
اي حتى لتوة مازلنا في الموجة الثانية
خاطر لا مرة عاودنا رجعنا للصفر حالة كيما في صيف 2020
اما الموجة الثانية هذه الي ما حبتش تخطانا حتى لتوة فيها طلعات وهبطات
المويجات هذوما سمينا كل وحدة فيهم "موجة"
الموجة الثانية واصلت حتى لنوفمبر وين الدولة عملت جملة من شبه الإجراءات
رتحنا شوية جمعتين ثلاثة وبعد رجع الوباء ما أقوى
بعدها بدات الموجة الثالثة الي تواصلت حتى لين اعلنو على الحجر الصحي متع جانفي 2021
الحجر الي صار وقتها كان سياسي وموش صحي
وفي بقعت ما يخليوه لين نرجعو للصفر حالة هوما دوبا ما ارتاحو من الاحتجاجات عاودو حلو البلاد ورجع الوباء في الانتشار
في الفترة هذيكا كان فما وحش ينتشر
العالم الكل كان خايف منو الي هو المتحور البريطاني 'الفا'
خسارة روح التونسي رخيصة في عينين المسؤولين
خلاو الحدود محلولة دخل المتحور وانتشر بين الناس
الموجة الرابعة واصلت حتى لرمضان وقتها أول مرة يتقص الأكسجين على تونس (تحديدا في صفاقس)
تلزو وقتها يعملوا حجر وشدونا رمضان كامل بحظر التجول
الحجر إلي عملوه وقتها يحشم متع أربعة أيام
رتحنا جمعتين وبعد هد علينا من أخطر الفيروسات إلي عرفتهم البشرية
نحكي على دلتا المتحور الهندي
وقتها في بالهم بيه شنوا عمل في الهند
شافو تصاور الجثث إلي تتحرق
شافو كيفاش الأكسجين تقص على الهند وكيفاش العالم الكل هب إلى مساعدتهم
ومع هذا خلاو الحدود محلولة وجابولنا الفيروس لبلادنا و تسببلنا في الموجة الخامسة
الله لا يعاود أيمات الدلتا
أخيب أيمات عرفتها تونس في تاريخها
بلادنا نكبوها
بلادنا ذلوها
نسيتو الحزن إلي كان في البلاد؟
نسيتو الوجيعة إلي عيشوهالنا؟
نسيتو المرضى إلي تقسم في دبوزة أكسجين في الكلوارات؟
تتذكروا رجل الأمن الله يرحمو وينعمو إلي مات مقصوص عليه الهواء قدم السبيطار في القيروان؟
تتذكروا مدير السبيطر إلي يبكي على مرضتو إلي بش يتقص عليهم الأكسجين؟
تتذكروا الفيسبوك إلي كل نهار ولا أكحل بتصاور التعزيات؟
ما أخيبهم أك الأيمات
ومع هذا ولا واحد في السلطة تحرك ومنع شعبو
خلاونا وحدنا أمام الفيروس
ما عملوا شي حتى شي
قعدوا يتفرجوا فينا نتعذبو وما عملوا شي
توصل هذا الكابوس لين أغلب الشعب إكتسب مناعة وحدو من الفيروس في أول جويلية
وبعد بالطبيعة بدا الفيروس في تراجع
جاو التلاقح في أوت مبعد زادو قواو في المناعة المكتسبة من الفيروس وهذا لواش عشنا ثلاثة شهور راحة وبائية
توا نجيو للموجة الأخيرة
الموجة هذي بدات من أول نوفمبر
وقتها الأرقام مازالت صغيرة
كانو عندنا 50 70 حالة في النهار
ومع هذا الموجة وقتها مازالت كي بدات
كنت نتحرك كل نهار في الفايسبوك في التلافز وفي الراديوات ومع هذا ما حبوا يعملوا شي
كي العادة ما تبدل شي
السلطة هي السلطة عمرها ما بدلت مقاربتها للشعب
كنا نشوفو في متحور أوميكرون شنوا قاعد يعمل في إفريقيا الجنوبية وفي أوروبا
ومع هذا ما عملوا شي
خلاو الحدود محلولة
عاودو خرجولنا حكاية بروتوكولاتهم المزعومة
ودخلولنا الفيروس من جديد
في شهرين ونصف إنتشر الفيروس في أغلب الشعب التونسي
وصل تقريبا لكل دار
لا سلم منو لا كبير لا صغير
إي خاطر الفيروس هذا يمس الصغار زادة
وشفناها الكل كيفاش صار في صغيراتنا
فما مساكن حتى إلي ماتوا الله يرحمهم ويصبر عايلتهم
شفنا إلي عمرو 42 يوم، إلي عمرو عامين وما ننساوش إسلام
إسلام نوارة كانت الأولى متع مكتبها لا عندها مرض تبع عليه كيما كذبوا لا شي
إسلام جاها الكوفيد عمللها Hepatite fulminante (إلتهاب كبدي حاد) خطفها من بين يدين والديها
مال العالم الكل ما يعوضش ضحكتها
الله يرحمهم الكل
بالرغم من هذا الكل السلطة ديما السلطة وما بدلتش مقاربتها للشعب
حتى صغارنا ما سخفوش عليهم
وبخلو حتى بش يوقفو الدروس
نتيجة سياسة الموت هذي قاعدين نعيشو فيها توا
شفنا أرقام قياسية ما ريناها في حتى موجة قبل
أكبر عدد اصابات كان يوم 18 جانفي ب12698 إصابة
ومن وقتها الأرقام تتراوح بين 8000 و 10000 إصابة كل نهار
في الوفيات الدولة تستعمل في سياسة "maquillage" ممنهجة للأرقام حكيتلكم عليها برشة مرات
كيفاش من أوت ولاو يعطيو في عدد الوفيات إلي تم الاعلان عليهم في نفس اليوم أكهو
والرقم الصحيح لازم وحدك تقوم بطرح الإجمالي متع النهار إلا الإجمالي متع النهار إلي قبلو
في الوفيات صحيح أقل من موجة دلتا
ولكن موش شوية جملة وحدة
بالعكس هم أرقام مفزعة
كل نهار نهارين الدولة قاعدة تقتل قد إلي توفاو في الموجة الأولى الكل
أكبر عدد وفيات وصلنالو يوم 24 جانفي ب51 ميت الله يرحمهم
هذا إلي عشناه وهذا إلي مازلنا نعيشو فيه
من نوفمبر وقت بدات الموجة ورجعت نتحرك كل يوم هذا إلي نبهت منو وهذا إلي صار
لاني سحار لا نعلم الغيب
سري الوحيد هو أني نمن بالعلم والرياضيات
العلم إلي لا يهمو لا في مناصب لا في سياسة ولا في مصالح
العلم إلي يعطيك الواقع كيما هو بلاش كذب ولا تزييف
واحد من المؤشرات مثلا إلي كل نهار نتبع فيه
هو عدد التكاثر الفعلي
هذا المؤشر هو معدل الفرد كي يبدا مريض قداش يعدي من شخص
كان العدد يبدا فوق الواحد الوباء بش يبدا ينتشر وكان تحت الواحد بش يبدا ينحصر
عدد التكاثر في تونس بدا يتزايد من أول نوفمبر وهو إلي خلاني نعرف بداية الموجة قبل العباد الكل
وصل للقمة في الجمعة الثانية من جانفي وبدا من وقتها يتراجع
مازال فوق الواحد
معناها مزلنا في مرحلة الخطر ولكن كان يواصل نزولو ويطيح على الواحد نجمو نتفرهدو شوية
هذا إلي نتمناه من كل قلبي
البلاد تعبت
الناس تعبت
عامين توا تفكوا من حياتنا
والله أمنيتي الوحيدة أن الكورونا تتنحى من بلادنا وترجع حياتنا كي قبل
ما صاب كان تتنحى وحدها كيما يحكيو المسؤولين
ولكن العلم موش هذا إلي يقولو لسوء الحظ
العلم يقول أن فما متحور جديد حكيتلكم عليه يوم 14 جانفي اسمو BA2
المتحور هذا ينتشر مرتين أسرع من الأوميكرون تحديدا بين 90 و-120% أسرع
يبدو أن حتى مناعة الأوميكرون ليست كافية ضدو وبرشة عباد مرضت بالأومكرون قاعدة تمرض بيه توا
المتحور هذا خلا دولة كما الدنمارك بعد ما شهدت Pic في أول جانفي تعيش توا موجة جديدة وين فسخت ال"pic" هذا وزادت فاتتوا بأشواط
أما زادة العلم يقول أن كان الدولة تتبع سياسة الصفر كوفيد كيما عملت الصين نيو زيلندا ولا حتى كمبوديا نجمو نرتاحو من الكورونا ومتحوريها
الحل بين يدين المسؤولين
كان جيت أنا رئيس هذا شنعمل
نحمي شعبي قبل كل شي
نقص الاداءة الكرديات الشيكات والفاتورات
كل شي ياقف لمدة ثلاثة أربعة جمعات
موش معقول العباد ما تخدمش والبنوك هابطة عليهم والقباضة تخنق فيهم
يصير صلح جبائي شامل يتفرهدو العباد ونجمو نقاومو الكل مع بعضنا هذه الفترة
بالطبيعة هذي الفرصة بش الدولة تبني هيبتها
هيبة الدولة ما تجيش بالقوة
هيبة الدولة تجي بالقدر
القدر إلي يشوفها بيه سيد البلاد والمالك الأصلي لهذه الأرض
فخامة المواطن إلي هو الساس متع كل شي
شوفو محلاها كان الدولة تعطي فلوس مباشرةً لكل مواطن محتاج بلاش إهانة وبلاش ما يتذل
المواطن هذا موش بش يولي يقدر البلاد؟ موش بش يربي صغارو على الحب والتضحية على خاطرها؟
وقتها لا واحد يجي ضد فكرة الحجر الصحي
وقتها في ثلاثة أربعة جمعات نرجعوا للصفر حالة في تونس
وبعد نحميو حرمت بلادنا
ما نمسخوهاش بالفيروس كيما عملوا إلي قبلنا
نعملوا إلي حكى عليه إبن سينا منذ ألف عام "الأربعينية" إلي سميناها حجر صحي إجباري
أي واحد جاي من الخارج من أي بلد فيه ولو حالة وحيدة من الفيروس يقعد في حجر صحي إجباري لين نتأكدو أنه سليم وبعد يجي بحذنا معزز مكرم
هكا نجمو نرتاحو من الفيروس إلا الأبد
هكا نجمو نمنعو تونس
هكا نجمو نبنيو مستقبل
هكا نجمو نرجعو لحياتنا
ربي يحميكم الكل ويبعد عليكم كل شر
Tags
أخبار