نهارة إلّي قابلت #مريم_الدبّاغ لأوّل و آخر مرّة في حياتي في برنامج بوليميك ما سلّمتش عليها في الكواليس و ما نافقتهاش و ما حسستهاش بالأمان باش بعدها نغدرها في البلاتو لأنّو مش من طبعي بالعكس خزرتلها بطريقة تخلّيها تتأكّد إنّي داخلة للبلاتو و مش باش نرحمها....
كلّمني سمير الوافي قبل الحلقة بليلة باش يقلّي راهي غدوة ضيفتنا و تناقشنا شويّة و كان عندي خيار بين إنّي نحضر للحلقة و بين إنّي نعتذر و للأمانة سمير الوافي كان متفهّم جدّا لموقفي منها و قلّي ليك مطلق الحرّية
قلت كان ما حضرتش باش يقولو خافت منها و ما حبّتش تواجهها و كان حضرت و عملت إلّي في مخّي فمّا شكون باش يقول عاملين سيناريو
وهاي تعدّت السّنوات و كيما قلت وقتها أقسم بالله العليّ العظيم إنّو إلّي صار وقتها في البلاتو لاكان حدّ في بالو بيه لا سمير الوافي ولا أي شخص ليه علاقة بالبرنامج و النّاس الكلّ تفاجأت و لو ترجع الأيّام نعاود نعمل نفس الشّي ،
اليوم الطّفلة توقّفت و الكلّ ولّت أبطال و تسبّ فيها
أنا بيني و بينها قضيّة تحكمت فيها بالحبس إبتدائيا ب3شهور بعد ما غلطت في حقّي و حقّ زوجي في أحد البرامج التّلفزيّة و قامت هي بإستئناف الحكم و الجلسة تعيّنت نهار 30 ماي و ما نعرفش شنوّا ممكن يتحكم فيها
"فقد أسقط حقّي إن حُكم لصالحي" و من هنا لهاكا الوقت نحبّ نقول إنّي ضدّ الشّماتة فيها أو سبّانها أنا مشكلتي معاها كان فرضانها علينا في وسائل الإعلام و كيف خرجت من الإعلام ماعادش يهمّني الباقي حياتها و أمورها و أنستغرامها و بدنها وهي حرّة
هذا موقفي
أنا أواجه من يضاهيني أو يفوقني قوّة ولا أدوس على من أسقطته الأيّام و لو لبعض اللّحظات
عربيّة
Tags
منوعات