الشاعر لزهر الضاوي يبدع في قصيدة عن فتاة حي هلال و قبلة رئيس الجمهورية.. " همس الصبي.. "

byموزاييك نيوز -أغسطس 13, 2022

👁️

0

على هامش قبلة الفتاة لرئيس الجمهورية ..لزهر الضاوي يكتب: "همس الصبي"..

في ختام زيارته اليوم السبت 13 اوت 2022، لحي هلال بتونس العاصمة بمناسبة الاحتفال بعيد المرأة، إصطحب رئيس الجمهورية قيس، سعيد معه الي قصر قرطاج أفراد عائلة تعيشي غرفة على وجه الفضل و لا عائل لهم سوى الام،

وفي تعليق على الصورة التي نشرتها رئاسة الجمهورية، كتب الشاعر "لزهر الضاوي، القصيدة الشعرية التالية:

-* همس الصبي"*-

نحب نبقى هوني في القصر

ومانرّوّحش ل"حيّ هلال"

حيّ "الميزيريا" و الفقر

حيّ "البطّال" و "الزّبّال"

.."خبّيني عندك خبّيني"..

يا"سيدي الرئيس" خلّيني..

نشوف العز ونملا عيني..

"بابا" مات وضاق الحال..؟؟

..نحب نذوق أيام في العز..

لكن آنا مني ملاين..

وقصرك قداش باش يهز..

والمستقبل ماهو باين..

و"الحَرْقة"عليها نتلَز..

وانت قداش باش تعاين..

وبلادي مابِتْ تفِز..

وقاسينا من البَحْر أهوال..

وصرنا كيف "أولاد الحجلة"

في كل بلاصة همّال..

وما حبّت "تدور العجلة"..

وحالتنا صارت "أحوال"..؟!!

..يا "سيدي الرئيس" اعذرني..

ورجّعني ل"حي هلال "..؟؟

مانحب بعطفك تغمرني..

وأندادي في نفس الحال..؟!!

نحب نبقى في "حي هلال"..

غير صلّحلي "حي هلال"..؟؟

وتونسنا الكلة صلّحها..

راي الكلة "حي هلال"..؟!!

وكان ناوي صحيح تنجّحها..

يااللا توكل بالأفعال..

يزّي.. رانا شبعنا اقوال..؟؟

يزّي..رانا شبعنا أقوال..؟؟؟

قفصة 2022/08/13)-* همس الصبي"*-