ال forfait هذا موجود في les opérateurs الثلاثة، تيليكوم، أورونج و أوريدو و إلي هو 25 Go ب 25 دينار لمدة شهر.
ال forfait ممتاز و تستعمل فيه مغلب الناس مهما كان المزود متاعهم و برشة ناس نحات حتى تعاقد wifi في الدار على خاتر ال forfait هذا يكفي و يوفي الإستعمال الكل الداخلي و الخارجي.و برشة ناس ما يوصلوش يكملو يستعملوه و يوفى الشهر و هو مزال ثمة رصيد إنترنت يعني المزودين الثلاثة رابحين علخر في ال forfait هذا.
عاد نظرا أنو الطلب كبر و الناس هابطة عليه كالبطاطا و نظرا للقدرة الشرائية تحت الصفر إلي ولات عند التونسي و نظرا أنو الشعب الإنترنت في هاته الفترة بالذات أصبحت أكثر من حياتية و أساسية، قرر المزودين الثلاثة أنهم يتضامنو مع الشعب التونسي و يزيدوه 5 ألاف فرنك كاملة في ال forfait و عجبك و لا طير قرنك..!
بلدان أخرى في وقت الكورونا الإنترنت ولات بلاش أصل..لذى أدعو التونسيين للتضامن و مقاطعة هذا المنتوج إلى أن يحشمو و يعاودو يرجعوه بالثمن إلي كان عليه.الناس الكل خذات باي في هالشعب..
جا الوقت إلي الشعب لازم يستعمل أسلحته بتحضر و من بينها المقاطعة.
بقلم خليل قنطارة.
Tags
أخبار